Transition team giandam sa Kapitolyo

CEBU, Philippines — Miumol si Gobernador Hilario Davide III og transition team nga maoy gitahasan sa pagpangandam alang sa epektibo nga turn-over sa bag-o unyang mga opisyale sa Kapitolyo sa umaabot katapusan sa buwan sa Hunyo karong tuiga.

Pinaagi sa Executive Order (EO) 4 nga giluwatan sa gobernador niadtong Abril 3, 2019, giumol ni Davide ang maong team diin siya ang chairperson ug si Bise Gobernador Agnes Magpale usab ang vice chairperson.

Ang transition team mao ang mosiguro nga hapsay ang transition sa local governance  gikan sa mga outgoing nga mga opisyales ug sa mga bag-ong molingkod sa pwesto, mga bag-ong pinilil o reelected officials nga magsugod na og trabaho sa Hunyo 30, 2019.

Apil sa nag-unang trabaho sa maong team mao ang pagpahigayon og inventories sa mga propeyedad sa probinsya ug mahipos ang mga official documents ug records alang sa pag turn-over.

Ang transition team mao usab ang mosiguro nga masumiter sa saktong oras ang Elective Local Official Personnel Date Sheet (ELOPDS) sa mga incoming official sa dili pa ang Hulyo 8, 2019 ngadto sa Sangguniang Panlalawigan.

Ang paghimo og transition team subay kini sa mandato sa Department of Interior and Local Government (DILG) pinaagi sa Memorandum Circular 2019-39 diin nakalatid usab niini nga ang tanang department heads apil sa maong team.

Ang mga provincial board gihatagan na og kopya sa maong EO ug nadawat ug na-note na usab kini atol sa ilang regular session niadtong Abril 15.  (/DILT) (BANATNEWS)