Genset room sa hotel nasunog

CEBU, Philippines — Paspas nga nakagawas ang mga nagcheck-in sa usa ka hotel nga nahimutang sa may Archbishop Reyes Ave. sa Brgy. Kamputhaw, Dakbayan sa Sugbo, human gialarmahan sa kabomberohan ang sunog sayo sa kadlawon kagahapon.

Ang kabomberohan nakadawat og fire alarm sa Hotel Elizabeth mga ala 1:33 sa kadlawon ug giisa kini ngadto sa second alarm pagka ala 1:46 ug hingpit kining nakontrolar alas 2:13 ug pagka alas 2:24 gideklara nga napawong na ang kayo.

Matud ni Fire Chief Inspector Noel Nelson Ababon, ang fire marshal sa siyudad nga ang sunog nagagikan sa ika-duhang andana sa maong hotel. Nasayran nga adunay onse ka andana ang maong building.

Sumala ni Ababon, partial ra hinuon nga nakan-an sa kayo ang lawak sa generator set sa maong hotel ug P10 mil lang ang gibana-bana nila nga danyos niini.

Nagpadayon pa ang imbestigasyon sa kabomberohan kon unsay hinungdan sa sunog.

Walay hinuoy natala nga naangol sa maong sunog.

Usa sa mga micheck-in sa maong hotel nga wala magpaila, miasoy nga kalit lang napawong ang kuryente ug nakadungog na dayon sila og kasikas hinungdan nga sila nanggawas sa ilang lawak ug ila nalang nahibaw-an sa gawas nga adunay sunog sa maong hotel. (/DILT)(BANATNEWS)