Semana Santa 2019 sa Sugbo nagmalinawon

CEBU, Philippines — Ang direktor sa Cebu Provincial Police Office nga si Police Colonel Manuel Javier Abrugena nagkanayon nga epektibo ang giumol nila nga security plan alang sa Semana Santa karong tuiga.

Ang maong security plan ilang napatuman sa mga dapit nga dugokonon kaayo og mga tawo sama sa Isla sa Bantayan mga lungsod sa San Remigio ug Minglanilla.

“Generally peaceful naman po ang celebration ng ating Semana Santa 2019 except for some isolated crime incidents, our security plan has been proven effective,” sigon ni Abrugena.

Giingong hapsay sab ang deployment sa kapolisan ilabi na sa augmentation sa Provincial Mobile Force Company.

Samtang matud sa hepe sa Cebu City Police Office Operations Branch nga si Police Major Wilbert Parilla nga malinawon ang Dakbayan sa Sugbo sanglit kadaghanang tawo namauli sa probinsiya, samtang daghang taga siyudad nangadto og laing lugar aron adto hinumduman ang esensiya sa Semana Santa.

Nadumala usab og tarong sa kapolisan ang bagang duot sa mga pasahero sa mga pantalan ug mga terminal. Gani ang Carbon Police Station nagpahigayon og simpleng programa sa Cebu South Bus Terminal aron malingaw ang mga pasahero samtang nagpaabot sa ilang masakyan.

Human sa Mahal nga Adlaw, ang National Youth Day na usab ang gipangandaman karon sa kapolisan.

Karong adlawa, magpahigayon og inspection ug run through ang Cebu City Police Office ug ang Police Regional Office-7 gikan sa Cebu Provincial Capitol grounds paingon sa Osmeña Boulevard alang sa preparasyon sa seguridad sa NYD.

Ilang gipangandaman ang seguridad sa foot procession karong Abril 24 ug ang Pilgrim Walk karong Abril 27 nga ipahigayon sa maong mga dalan diin gilauman nga salmotan sa liboan ka mga tawo. (/DILT)(BANATNEWS)