Siete Palabras 2019 nagsentro sa kabatan-onan

CEBU, Philippines — Subay sa Year of the Youth nga gisaulog karong tuiga, halos nagsentro ang tema sa Siete Palabras 2019 nga gihimo sa Cebu Metropolitan Cathedral niadtong Biyernes Santo, sugod sa alas 12 sa udto hangtud alas 3 sa hapon.

Ang pagbatbat sa Siete Palabras, gilangkuban kini sa mga kaparian ug layko lakip ang mga kabatan-onan nga nahimong mamumulong niini. Ang Siete Palabras mao ang pito ka mga katapusang pulong nga giluwatan ni Hesus sa dihang naghingutas na siya sa kamatayon sa krus.

Atol sa pagbukas ni Fr. Andrei Ventanilla, ang Secretary of the Archbishop of Cebu, mitug-an kini nga dili lang batan-on maoy hinungdan sa mga bati nga nahitabo sa katilingban, kay ang batan-on kanunay madasigon ug maoy kusog sa pagserbisyo diha sa simbahan.

Gitug-an ni Ventanilla, nga ang henerasyon karon mubo lang ang pag-agwanta sa mga problema ug gamay na lang ang pasensiya ug palingpaling na usab ang ilang mga desisyon. Hinungdan nga malaumon siya nga ang mga kabatan-onan makakuha og mga maayong pagtulon-an sa pagpaambit sa pito ka pulong ni Kristo.

Si Fr. Joris Calsa, SDB mipadayag atol sa unang pulong nga ang henerasyon karon, lahi, apan walay bata ug kabatan-onan nga nagmugna og kadautan kay biktima lang usab sila sa kultura. Dili dautan ang mga kabatan-onan apan nakalimot lang sila.

Si Calsa, mihatag og pipila ka mga sugyot alang sa mga kabatan-onan nga naglangkub sa paghatag og walay hunong nga pagpasaylo, hatagan sa pagtagad ug lakip usab ang pagpamati kanila, kay ang mga batan-on mao ang hulagway ni Hesus. Ang pagpamati kanila nagpamatuod nga adunay pagsalig ug gugma ngadto kanila.

Si Fr. Joselito Gutierrez, NYD 2019 over-all manager festival site ug member team of pastor St. Joseph Parish sa Mabolo, mihagit sa mga batan-on nga ang tinuoray nga kagawasan magsubay gayud kini sa pagbulig sa Labaw nga Makagagahum ug pagbukas sa kaugalingon gikan sa pamilya ngadto sa kapilya o parokya diin ipaambit kanunay nga adunay Dios nga nahigugma kanila

Si Gutierrez, mipadayag sa mga batan-on nga anaa gayud kanunay ang mga hagit ug kinahanglan gayud kining hangpon.

Samtang ang uban nga mga mamumulong mipadayag nga mahimong inahan dili lang sa ilang mga anak apan ngadto sab sa nanginahanglan og inahan.  Si Cebu Archbishop Jose Palma sa iyang panapos, mahinangpon ug mapasalamaton sa tanan ug malaumon siya nga daghan mga mapupo nga maayong pagtulon-an gikan sa mga mamumulong ilabi na ang mga kabatan-onan.

Ang arsobispo mipadayag nga ang Dios puno sa gugma ug nasayod kini kanunay unsay anaa sulod sa kasing-kasing sa matag tawo. (/DILT)(BANATNEWS)