Franz Sabalones patay na?

CEBU, Philippines — Gipangita nga self-confessed drug lord nga si Franz Sabalones gibanhigan patay didto sa eskina sa Scout Borromeo ug Mother Ignacia Street Barangay South Triangle sa Quezon City sumala pa sa kapolisan, apan ang kapolisan dinhi sa Sugbo tak-om kun may kalambigitan ba sa ilegal nga drugas ang motibo sa pagpatay kaniya.

Sigun pa ni Police Major Elmer Monsalve, hepe sa Criminal Investigation Detection Unit sa Quezon City Police District paingon manan-aw og billiards silang Sabalones ug mga higala dihang kini gibanhigan.

Matud pa pagkanaog ni Sabalones sa Grey nga Ford Ranger niini gipusil kini sa ulo sa wala pa mailhing mamumuno.  Wala dayon siya mailhi sa mga otoridad sanglit lain-lain ang mga pangalan ang mga identification cards nga anaa sa pitaka niini.

Kini naglakip sa ID nga naa iyang hulagway apan nagdala sa pangalan nga Jerome G. Cabilao, Jerome Sanchez Cabilao, Abdulyakin Tating Limpasan, ug residente sa Calle Zaragosa Castillo Classic, BF Resort Village, Talon Dos, Las Piñas City. Ang usa niini, nagpakita pang siya usa ka Pastor sa usa ka tinuohan.

Apan sigun ni Monsalve nga positibong giila si Sabalones sa iya mismong ig-agaw nga beautician nga si Joselito Cabilao.

“Bali five IDs nakuha natin sa kanya pero iba’t ibang pangalan kaya ngayon kung makukunan namin nang statement ‘yung pinsan niya na magtuturo na si Cabilao nga ‘yun ay talagang siya (Sabalones) eh, yun na ilalagay namin," matud niini.

Butyag ni Monsalve nga sukad gibuhian si Sabalones human siya miangkon sa publiko nga usa siya ka drug lord niadtong 2016, didto na kini nagpuyo sa Las Piñas.

Dugang sa maong hepe nga aduna silay mga intelligence report nga nagtumbok nga gipadayon gihapon ni Sabalones ang iyang illegal nga negosyong shabu didto sa Manila.

Ang direktor sa Cebu Provincial Police Office nga si Police Colonel Manuel Javier Abrugena nagdumili sa paghatag og pamahayag bahin sa kamatayon ni Sabalones ug nagdumili sab siya pagkompirmar sa kamatayon niini.

“We cannot give a comment, Mam.  Hindi po kasi sa area natin nangyari and we cannot speculate,” sigun niini.

Apan butyag niini sa Banat News nga ang maong hitabo siguradong nakapiang sa grupo ni Sabalones.

“If the demise of Sabalones is true,  remnants of the group will lay low and might help us in continuously gaining the upper hand in our campaign against illegal drugs,” si Abrugena nagkanayon.

Samtang ang direktor sa Police Regional Office-7 nga si Police Brigadier General Debold Sinas wala  pa moluwat og pamahayag bahin sa maong balita.

Human sa pagpusil patay kang Sabalones, suway nga gibisita sa Banat News ang resort nga gipanag-iya niini sa Lungsod sa San Fernando apan sirado na kini ug susama’g wala nay nag-atiman.

Apan dunay mga tawo didto nga nakatug-an nga sukad nga nipatim-aw kang Presidente Rodrigo Duterte si Sabalones wala na kini mopakita didto.

Apan pipila sa nahinabi sa Banat News dili motoo nga si Sabalones ang gipatay didto sa kaulohan.

Wa say mga residente sa San Fernando ang nakahatag og impormasyon kun asa na ang ilang bise mayor nga igsuon ni Sabalones nga si Fralz Sabalones kinsa usa sab sa ginganlan ni Duterte nga narco-politician.

Ang patay nga lawas ni Sabalones, giingong gikuha na sa nagpailang paryente niini nga si Joselito Cabilao. (Rowena Capistrano/IBM)(BANATNEWS)