Plano sa kalikupan gipangita sa COA

CEBU, Philippines — Ang Commission on Audit (COA) nagmando sa kagamhanan sa Siyudad sa Sugbo nga kinahanglan i-update niini ang 10-year plan alang sa Solid Waste Management kay posibleng mosangpot kini sa pagtaas sa mga isyu kalabot sa gobyerno, kalikupan, ug sanitasyon.

Sumala sa Audit Observation Memorandum nga giisyu niadtong Pebrero 19, ang COA mipadayag nga ang siyudad napakyas sa pag-update sa iyang ecological solid waste management plan nga supak sa pagpatuman sa Republic Act 9003 o ang "Ecological Solid Waste Management Act of 2000."

Ang AOM gipirmahan nila ni State Auditor V Maria Daisy Bercede ug State Auditor IV Lita Lamparas.

Ang COA nagkanayon nga ang 10 ka tuig nga plano kinahanglan maghupot sa pagtugot gikan sa National Solid Waste Management Commission nga gikinahanglan sa balaud.

Si Cebu City Environment and Natural Resources Office head nga si Nida Cabrera nagkanayon nga ang iyang buhatan mihatag na og kopya sa maong plano ngadto sa konseho sa miaging semana.

"Moadto pa ko sa Manila para mo-defend sa 10-year plan sa EMB, DENR," dugang pa      niya.

Ang COA nag-ingon nga ang katuyoan sa Local Government Solid Waste Management Plan (LGSWMP) mao ang pag-establisar sa usa ka taas nga termino nga luwas nga mga pamaagi sa pagbag-o sa kalikupan aron sa pagdumala sa sanitary landfill ug sa pagpasira sa mga dumpsite alang sa usa ka malungtarong sistema sa pagpangolekta ug paglabay sa basura ubos sa piho nga mga target sa usa ka timeframe.

Kon wala ang updated nga plano, ang COA nagkanayon nga ang pag-uswag sa dakbayan mahimong magpabilin nga dili na mapanalipdan ug epektibo.

Isip usa ka tubag, ang siyudad nag-ingon nga nag-usab sila ug nag-draft na sa 10 ka tuig nga plano. Nasayran nga una kining gihatag niadtong Disyembre 2016 sa buhatan sa Environmental Management Bureau-7.

Hinuon, gibalik kini sa EMB-7 sa siyudad alang sa mga kausaban samtang nagpaabot usab sa consultant sa siyudad nga nag-andam alang sa katapusang plano sa pagpa-undang ug rehabilitasyon sa Inayawan Sanitary Landfill.

Ang COA nagkanayon nga ang siyudad kinahanglan nga mag-update sa plano kay gikinahanglan kini alang sa komprehensibong pag-monitor sa mga basura, rates, waste projection ug ang pag-uswag nga gihimo sa pagpatuman sa mga target nga gibutang sa paggamit, pag-recycle, ug pag-composting sa mga basura.

Si Cabrera nagkanayon nga siya naglaum nga ang siyudad makabaton na unya sa aprubadong 10 ka tuig nga plano sunod bulan. (/DILT)(BANATNEWS)