Traffic enforcers sa Talisay nahadlok

CEBU, Philippines —  Mibati og kahadlok ang mga sakop sa City of Talisay-Traffic Development Authority (CT-TODA) sa ilang pagpatuman sa lagda sa trapiko.

Kini human ilang hugtan ang mga badlungong drayber sa ilang mga kalapasan.

Si Rogelio Villaver, pangu sa CT-TODA niangkon nga hasta siya yanohon lang sa mga drayber  nga iyang masita.

Apan aduna sab gyud mga tarong nga drayber nga musunod ra sa lagda sa trapiko.

Matud pa ni Villaver nga dili tiaw ang ilang trabaho tungod kay klase-klaseng tawo ang ilang masugatan.

Gani sa iyang pagsita sa mga drayber nga klarong adunay kalapasan gikumot lang ang citation nga iyang gi-isyu diha sa iyang atubangan.

“Gikumotan gyud ko og citation kaduha ka higayon. Isog pa gyud kaayo dungan sa bahad nga balikon lang kuno ko niya,” asoy pa ni Villaver.

Sigon pa niya nga naa siya’y giumol nga team sa CT-TODA nga ang trabaho mao gyud ang pag isyu og citation sa mga nakalapas. Dali sila nga maabot gumikan kay matag tawag nila motorsiklo man ang ilang gamiton.

Siya nanghinaut nga unta sila dili lang pasagdan sa kadalanan kay para niya mas maayo gyud nga butangan og kapulisan ang ilawom sa flyover sa Tabunok nga gihulagway nga naa diha magtapok ang mga buotan ug mga badlungon nga drayber. — LPM (BANATNEWS)