P14 milyong danyos sa agrikultura

CEBU, Philippines —  Gumikan sa El Niño phenomenon, miabot na sa P14.9 milyones ang danyos sa agrikultura sa Siyudad sa Sugbo subay na sa talaan sa City Agriculture Department.

Ang maong datos, nakuha sa mga field technicians sa City Agriculture Department niadtong sa Marso 31 subay na sa pagpahibawo ni City Agriculturist Apple Tribunalo.

Sa ilang data, ang El Niño nakaapekto sa 317 ka mag-uuma gikan sa 28 ka bukirang barangay.

Matud ni Tribunalo, ang kasamtangang datos isumetir nila sa Cebu City Disaster Risk Reduction Management Office (CCDRRMO) isip basihan alang sa deklarasyon sa state of calamity sa mountain barangays.

Ang buhatan niya uban sa mga concerned offices sama sa CCDRRMO, Department of Agriculture ug Metropolitan Cebu Water District aduna unyay meeting aron tukion ang epekto sa huwaw ngadto sa mga mag-uuma.

Kon ang CCDRRMO mo-rekomendar na sa deklarasyon sa state of calamity, i-presentar kini sa city council alang sa pagtugot.

Gumikan sa minilyon nga danyos, napanglantawan nga adunay pagsaka unya sa mga palaliton.

Ang tabang nga ihatag sa city government karong katapusan sa buwan ngadto sa mga apektadong mag-uuma naglangkub sa 1,200 ka water drums, 500 ka hoses, 150 ka power sprayers nga nagkantidad og P12 milyones.

Nasayran nga ang pundo alang sa maong katuyuan gikuha sa approved budget sa agrikultura niining tuiga ug sa pagkutlo ning maong balita, ang supplier nagsugod na og deliver sa mga items.  DILT (BANATNEWS)