Supporter sa mayor nakuhaa’g armas

CEBU, Philippines – Gikatahong security guard ni Santa Fe Mayor Jose Esgana nadakpan ug nakuhaan og pipila ka mga armas pinasikad sa search warrant niadtong Sabado didto sa Barangay Mankaban, Santa Fe, Cebu.

Ang gidakop giila nga si Elseo Cabrera Bula alyas Dimas ,49, residente sa dapit. Base sa report sa Criminal Investigation and Detection Group-7 (CIDG-7), ang warrant giluwatan ni Judge Jineffer Singco sa Regional Trial Court-7, Branch 79 sa Dakbayan sa Bogo. Nakuha gikan niini ang usa ka kalibre .45 nga pistola; usa ka kalibre .38 revolver; usa ka magazine sa kalibre .45; upat ka mga bala sa kalibre .45 ug lima ka bala sa .38.

Butyag pa sa deputy chief sa CIDG-7 nga si Police Superintendent Hector Amancia, nakadawat sila og report nga magdala-dala og armas ug manghadlok og tawo si Bula mao nga gi-applyan nila kini og search warrant.

Apan gihimakak kini sa manghud sa dinakpan nga si Rubina Bula. Matud niini nga gipolitika ra sila kay wala sila modapig sa ilang paryenteng nakig-atbang kang Esgana.

Gihimakak sab ni Rubina nga security guard sa mayor ang iyang maguwang apan wala siya motug-an unsay trabaho sa maguwang. Matud niya nga dugay na silang gipasanginlang  private army sa mayor, gani giingong gireklamo si Esgana ngadto sa Ombudsman nunot niini.

“Nasuko sila nga naa mi kang Mayor Esgana mikampi, nanarbaho lang mi. Kay di sila kadulot ngadto sa Ombudsman maong gipamolitika mi nila. Kaming mag-igsuon ginganlan mi nga private army, walay private army sa Sta.Fe,” dugang pasabot ni Rubina.

Ang hepe sa kapolisan sa Sta. Fe nga si Police Inspector Johnrey Cassanova mikompirmar nga wala silay namonitor nga private army sa Santa Fe, apan alerto sila samtang nagkaduol na ang piniliay.  Gibutyag sab niya nga wala motambong sa ilang peace covenant signing si Esgana nga gihimo pipila ka adlaw na ang nilabay. (/IBM)(BANAT NEWS)