13-anyos nakuryentihan

CEBU, Philippines — Patay ang usa ka 13-anyos nga bata human kini nakuryentehan sa poste sa kuryente diha sa Barangay Campusong, sa Lungsod sa Borbon niadtong Sabado sa hapon.

Base sa report sa kapolisan, giila ang biktima nga si Christian Ferolino Impas, residente sa dapit.

Sigun pa ni Police Officer 3 Ernesto Pablo Jr., desk officer sa Borbon Police Station, gikan nanginhas sa maong dapit ang bata.

Dihang paingon kini mopauli mi-shortcut kini pinaagi sa pagkatkat sa usa ka paril nga 15 ka tiil ang gitas-on,  apan wala na kini makatabok sa pikas kay nipilit kini sa poste nga nga dunay kuryente.

Nataud-tauran pa usa nakuha sa mga linemen sa electric company ang bata ug patay na kini pagabot sa tambalanan. (/IBM)(BANATNEWS)

3-anyos nga nagduwa naigo og saag nga bala

Camille Pateres

CEBU, Philippines — Nalandig sa tambalanan ang usa ka 3-anyos nga batang babaye human naigo og saad nga bala samtang kini nagduwa sa sulod sa ilang balay diha sa Barangay Tapun, Dalaguete niadtong Sabado sa buntag.

Giila sa kapolisan ang bata nga si Xyllene Esto Pautan, residente sa dapit.

Sigun pa sa hepe sa Dalaguete police station nga si Police Chief Inspector Roger Quijano, nagduwa ra sa ilaha uban sa silingan si Pautan dihang nakadungog ang tanan og usa ka sipang boto.

Nakit-an na lang sa apohan nga nahagba ang apo ug adunay samad pinusilan sa bukton niini. Matud pa nga natapsingan sab ang dughan sa bata.

Gidala kini sa Doctor Ildefonso Alcantara Memorial Hospital didto sa Barangay Poblacion sa maong lungsod ug gibalhin og tambalanan sa Syudad sa Sugbo.

Wa pa matino sa kapolisan kun kinsa ang nagpabuto og armas apan dako ilang pagtuo nga taga diha ra duol sa ilang dapit ang nagpabuto niini, apan wala sa rekord sa kapolisan nga dunay molupyo sa maong lugar nga may lisensyadong armas. (/IBM)(BANATNEWS)