Prayoridad ang PWDs ug seniors sa eleksyon

CEBU, Philippines — Ang Persons with Disabilities (PWDs), senior citizens ug pregnant women adunay duha nga pilian aron mahimong hamugaway ang ilang pagbotar sa umaabot nga May 13, 2019 National ug Local Elections.

Si Atty. Marchel Sarno ang Cebu City North District Election Officer miingon nga ang Comelec mo-prioritize sa senior citizens, 'heavily pregnant women' ug PWDs atol unya sa adlaw sa piniliay.

“We have emergency accessible polling place for them and express lanes. They can choose what to avail on elections", butyag ni Sarno.

Ang maong kalambuan subay na sa hangyo sa konseho sa siyudad nga himuong prayoridad ang paggamit sa ground floor sa matag public school building isip polling place ngadto sa mga senior citizen ug PWD voters sa dakbayan.

Gihangop ni Sarno ang pagpalabang og resolusyon nga gipangamahanan ni Konsehal Joy Augustus Young atol sa ilang regular session niadtong Marso 19.

Labot sa emergency accessible polling place, si Sarno miingon nga ang PWDs, senior citizens ug pregnant women mahimong modirekta og adto sa special polling place sa ground floor, sa first come, first served basis.

“Among tawag ana is emergency accessible polling place meaning kanang senior citizens, PWD ug heavily pregnant sa multi-story building like Abellana, pwede sila pabotohon dinhi sa ubos. Ang buhaton ana, kuhaon ilang ballot sa ibabaw ug dad-on sa ubos", dugang ni Sarno.

Kini midugang nga adunay support staff ug watchers sa partido nga mokuha ug mobantay sa balota sa marginalized sectors.

Kon adunay taas nga linya sa PWDs, senior citizen ug pregnant women sa emergency accessible polling place, kini miingon mahimo silang makapahimulos sa express lane sa ilang tagsa-tagsa ka presinto.

Matud ni Sarno nga ang Comelec dili mo-implementar sa emergency accessible polling place sa tanang tunghaan apan kadto lang sa mga eskwelahan nga multi-story buildings sama sa Abellana National School, tunghaan sa Brgy. Apas, Guadalupe, Tejero ug uban pa.

Sa approved resolution ni Young, kini miingon nga ang Comelec mi-designate sa public school (elementary ug high school) buildings isip polling places atol sa Election Day.

“Several senior citizen voters and persons with disabilities (PWD) in Cebu City requested that their voting place will be located in the ground floor of the school building", matud sa konsehal.

Nunot niini, ang City Council miawhag sa Comelec nga i-prioritize ang kaluwasan ug kahamugaway sa mga senior citizen ug PWD voters.

Sigon ni Young nakadawat siya og mga reklamo mahitungod niini sa miaging elections diin matud pa, adunay mga pipila ka polling precincts nga walay special area alang sa elderly ug PWD. Hinungdan nga nakadesisyon siya nga mopasar sa maong resolusyon paghangyo sa Comelec. (/DILT)(BANATNEWS)