Mga pananum, isda apektado na sa El Niño

CEBU, Philippines – Dili mumenus siyam ka mga lungsod ug dakbayan sa Sugbo ang nakatala na og kadaot sa pananom ug pagkamatay sa binuhing isda tungod sa epekto sa weak El Niño.

Kini base sa report nga nakuha sa Provincial Agriculture's Office. Ang kadaot natala ni sa lungsod sa Argao, Badian, Balamban, Dumanjug, Mandaue, Oslob, Sibonga, Alcantara ug Carcar.

Didto sa  Carcar, siyam ka mananagat ug asosasyon ang apektado ang ilang fishcage, fishpond ug seaweed farm.

Aduna usab 44, 200 ka mga  isda nga tilapia ug bangus ang namatay tungod kay init sa temperatura sa tubig sa mga fishponds ug 12,000 ka kilo usab sa seaweeds ang nadaot.

"Experienced ice-ice of seaweeds stems and thallus due to high temperature and bacterial envasion" sumala sa report ni Simeont Aledon ang fishery coordinator sa Office of the City Agriculturist sa Carcar.

300 ka kilo sa talaba ang nadaot tungod gihapon sa kainit na sa temperatura.

Didto sa Alcantara, 194 ka mga aqua farm operators usab ang apektado tungod namatay ang ilang mga binuhing tilapia, danggit, bangus, pasayan ug uban pa.

Sa dakbayan sa Mandaue, 4,900 ka bangus sa .5 ka ektarya nga area sa barangay Jagobiao usab ang patay tungod gihapon sa huwaw.

Didto sa Dumanjug, 20 ka ektarya sa mais usab ang nadaot tungod gihapon sa grabeng kainit, samtang didto sa Sibonga 4.55 ka ektarya sa talong, string beans, okra, tomatoes ug saging ang nadaot.

Si Roldan Saragena ang provincial agriculturist nagkanayon nagpadayon karon ang ilang verification sa maong mga lungsod pinaagi sa tulo ka teams sa ilang buhatan nga maoy nisuroy ngadto sa kalungsoran. —/LPM (BANAT NEWS)