P3.4 million balor sa marijuana gilarot sa Toledo
CEBU, Philippines – Moabot ngadto sa 3.4 milyones ka pesos nga balor sa illegal nga marijuana ang nalarot gikan sa duha ka mga marijuana plantation didto sa Barangay Tungkay ug Barangay General Climaco, Dakbayan sa Toledo kagahapon sa buntag.
Ang tigpamaba sa Philippine Drug Enforcement Agency-7 nga si Leia Albiar-Alcantara midetalye nga nakadawat ang ilang ahensya og impormasyon gikan sa usa ka concerned citizen kabahin sa lapad nga marijuana plantation sa maong dapit.
Tungod niini, dali gironda sa mga ahente sa PDEA-7 inabagan sa Toledo City Police Station, Naval Intelligence Service Group ug Naval Special Operations Group Naval Forces Central ang maong dapit.
Apan wala na maabti sa maong pwersa ang cultivator sa maong mga marijuana.
“Naay concerned citizen nga nihatag sa info, wala pa na-identify kinsa ang cultivator,” sigun ni Alcantara.
Aduna 10,000 kabuok stalk sa marijuana ang nalarot ug gisunog sa mga operatiba sa lugar.
Matud sa tigpamaba nga gibana-bana nga mobalor na ngadto sa P3.4 milyon ang maong mga marijuana.
Kasamtangan pang giimbestigaran sa PDEA kun kinsa ang tag-iya sa maong luna nga gihimong tamnanan sa illegal nga mga marijuana.—/LPM (BANAT NEWS)
- Latest
