Unom ka tinun-an naaktohan nga migamit og marijuana

CEBU, Philippines – Unom ka mga tinun-an sa usa ka dakong unibersidad ang naaktohan nga naghithit og linikit nga pinaugang dahon sa marijuana diha sa Barangay Looc sa Dakbayan sa Mandaue.

Ang maong mga tinun-an naaktohan sa kapolisan sa Presinto 5 sa Mandaue City Police Office (MCPO)  nga naghithit og mga linikit nga pinaugang dahon sa marijuana.

Si Police Senior Inspector  Rayco Romaguera miingon nga sa unom ka mga tinun-an sa kolehiyo ang naglakip niini ang 17  anyos nga taga Barangay Cajulao sa Dakbayan sa Lapu-Lapu  kinsa kauban sa  lima pa ka tinun-an sa kolehiyo sa usa ka unibersidad nga  nagbase sa dakbayan sa Sugbo apan may sangang tulunghaan usab  sa  Mandaue.

Sa laing bahin, duha ka pusher og shabu sa Barangay Gun-ob sa Lapu-Lapu City ug laing usa didto sa Barangay Calumboyan sa Compostela ang nasikop.

Si Police Chief Inspector Wyne Magbanua nga maoy hepe sa Presinto 3 sa Lapu-Lapu City Police Office (LLCPO) miila sa ilang nadakpan nga sila si Michael Cantoja, 20 nga taga Marigondon  ug Aldwin Paguerre, 20 nga taga Lungsod sa Cordova.

Samtang si Police Inspector Harley Silay  nga maoy hepe sa Compostela Police Station miila usab sa ilang nadakpan nga mao si Richard  Sagarino Arcilla, alyas RJ, 31 anyos nga nagpuyo sa Barangay Calumboyan sa Lungsod sa Compostela.

Didto sa Talisay City, duha ka manag-agaw ang gibalhug dihang nakuhaan og gamayng nga pakite sa mga gituohang shabu. Kini sila si Glen Cabiles, 30 anyos, ulitawo ug si Limuel Cabiles Osayan, 23 anyos, nga pulos nagpuyo sa Barangay Lawaan 3 sa maong siyudad. — Gabriel Bonjoc/LPM (BANAT NEWS)