Kaso sa dengue sa Central Visayas padayong mitaas
CEBU, Philippines – Gibutyag sa mga opisyales sa Department of Health-7 nga aduna na’y 5,339 ka mga kaso sa dengue sa Central Visayas diin gitala nga 33 na ka tawo ang namatay tungod niini.
Kumpara sa parehong semana sa miaging tuig nga naabot og 1,598 ka mga kaso sa dengue nga mikalas og 11 ka mga kinabuhi, nitaas kini og 234%. Sa pagkakaron, ang Cebu ang aduna’y labing taas nga kaso sa dengue sa tibuok rehiyon diin miabot na kini sa 3,471.
Gisundan kini sa Bohol (923) Negros Oriental (888) ug Siquijor (55).
Hangyo ni Ma. Michelle Acosta, ang Senior Health Program Officer sa DOH, sa Local Government Units (LGUs) nga aktibong palihokon balik ang ilang Anti-Dengue Ordinances.
“Para mapaspasan nato [ang pagresponde sa dengue] kay grabe g’yud ang pagsaka sa atong dengue,” dugang ni Acosta.
Pahimangno usab ni Acosta sa publiko nga sa pagpadulong sa ting-init, magbinantayon ang mga katawhan sa pagpundo og tubig, siguraduhon ang pagtaklob og pag-ayo sa mga sudlanan niini, ug pagsablig sa mga wala na gamitang tubig aron dili kini puy-an og mga lamok.
Laing hangyo pa ni Acosta nga mokooperar unta ang homeowners sa Rural Health Units (RHUs) nga mosuroy sa ilang mga panimalay aron mag-misting.
“Magpa-misting gani ang RHU, dili magpasulod sa balay,” matud pa ni Acosta, kinsa midugang nga ang pagkabalaka kay dili lang sa mga lamok gawas sa balay kun di hasta sab sa sulod. Hannah Joy I. Yana/LPM (BANAT NEWS)
- Latest
