Mingla dunay tow-away zone

CEBU, Philippines — Guyoron o i-tow na sa mga traffic enforcers sa Lungsod sa Minglanilla ang mga sakyanan nga gi-park o nag-estambay sa mga dalan nga gisuta sa lokal nga kagamhanan isip “tow-away zones” .

Pinaagi sa Ordinance No. 28 series of 2018, dakpon na ang mga sakyanan nga nagbabag sa mga dalan.

“To deter, control and regulate such unlawful parking, standing or stopping, certain streets of the Municipality of Minglanilla have to be declared tow-away zones and official signs have to be erected designating said streets as such” pagbasa sa explanatory note sa maong ordinansa nga gipasaar sa Sangguniang Bayan sa maong lungsod.

Dugang sa maong note, nga ang pagdaghan sa sakyanan nga naggamit sa kadalanan sa Minglanilla, nahimo na nga “rampant” ang maong illegal parking ug pag-hunong sa bisan asa nga dalan o dapit sa lungsod nga nakamugna og traffic.

Ang Lungsod sa Minglanilla maoy usa sa mga lungsod sa habagatang bahin sa Lalawigan sa Sugbo ang adunay grabe ang problema sa trapiko hilabina peak hours ug peak season.

Ang mga sakop sa Minglanilla Traffic Commission (MITCOM) maoy gitahasan nga modakop sa mga nakalapas sa maong ordinansa ug mo-tow sa mga sakyanan.

Ang masakpan mahimomg ma-priso og dili momenus usa ka bulan ngadto sa unom ka bulan ug mamultahan og di momenus P2,000 ngadto sa P5,000. (Le Phyllis F. Antojado/DILT)

Sinakong basura nahipos sa Santiago Bay

Sinako nga mga basura ang nakuha sa mga sakop sa Cost Guard District Central Visayas atol sa ilang gipahigayon nga dakung coastal clean-up sa Camotes Island subay sa ilang iCare Campaign Plan kagahapon sa buntag. Matud ni Lt. Junior Grade Michael John Encina, tigpamaba sa PCG nga isip usa sa mga bisitahon sa mga turista ang maong dapit gumikan sa ilang nindot nga kadagatan, hinungdan nga kinahanglan kini nga protektahan mao nga nakig-alayon sila sa Camotes Island LGU, PNP, DENR ug beach resort stakeholders alang sa pagpahigayon nila og coastal clean-up sa baybayon sa Brgy. Santiago sa Lungsod sa San Francisco.

Dugang ni Encina nga atol sa ilang coastal clean-up, nakakolekta sila og 20 ug 5 ka sako nga malata ug dili malata nga mga basura gikan sa coastal area. (/DILT)(BANATNEWS)