Death penalty dili solusyon sa krimen - Palma

CEBU, Philippines — Si Cebu Archbishop Jose Palma subling mibarug nga dili gihapon solusyon ang death penalty sa mga nahitabo nga krimen.

Mao kini ang tubag sa arsobispo subay sa mga panawagan nga ibalik ang death penalty tungod sa grabe na kaayo nga mga linuog nga krimen nga binuhatan sa pipila ka mga mamumuno nga wala pa mailhi.

Nasayran nga human sa linuog nga nahitabo ni Christine Lee Silawan, ang 16-anyos nga babayeng gilaplapan ang nawong ug gikuhaan og pipila ka mga parte sa iyang lawas, lakip na usab ang pipila ka mga biktima sa pagpatay, daghang netizens ang nanawagan nga ibalik ang death penalty.

Matud ni Palma, magpabilin gihapon ang simbahan sa iyang baruganan nga dili gihapon makiangayon ang death penalty, diin haum nga ipatuman lamang kon unsay sakto nga silot sa mga nakahimo og sala apan dili sa punto nga sila patyon.

Sumala sa arsobispo, adunay mga nasud nga adunay gipatuman nga death penalty apan dili gihapon kini basihanan nga mikunhod ang mga kaso sa krimen nga nahitabo sa ilang lugar kay ang death penalty dili man solusyon sa krimen. (/DILT)(BANATNEWS)