Negosyante gipusil diha sulod sa buwangan

CEBU, Philippines – Usa ka negosyante ang nalandig sa tambalanan human kini pusila sa wala mailhing kriminal diha sa sulod sa Mandaue de Gallera coliseum sa Barangay Tabok, Dakbayan sa Mandaue niadtong Huwebes sa gabii.

Si Police Officer 2 Matt Roco sa Presinto 3 sa Mandaue City Police Office  (MCPO) niila sa biktima nga si  Esidro “Edic”   Go, 53, minyo, nagpuyo sa Barangay Pitogo, Lungsod sa Consolacion ug usa ka negosyante nga nanag-iya og mga balay paabangan nga naglakip sa mga apartment ug ingon man fishpond.

Sa pakisusi nga gihimo sa kapolisan ilang nasuta nga nakabaton og samad pinusilan ang biktima sa iyang buko-buko ug tangkugo ug dali kini gidala sa duol nga tambalanan.

Sa wala pa mahitabo ang pagpamusil si Go nagtindog kini diha sa gaffing area sa buwangan diin usa ka wala mailhing lalaki ang kalit lang nga nipusil kaniya.

Ang maong kriminal kinsa daling nisibat giingong nagsul-ob og shorts, sweatshirt, surgical mask ug ball cap nga pula.

Base sa footage sa closed circuit television (CCTV) cam diha sa sulod sa buwangan dihang nakasandig ang biktima sa bildo gipusil na kini sa maong kriminal apan natapsingan lang sa bala si Go.

Nasuta sa kapolisan nga kanunay sa maong buwangan si Go isip costumer ug usahay makita usab kini nga motaud og buwang sa manok nga igtatari. Kasamtangan karon nga gisubay sa kapolisan ang motibo sa krimen. (/BDB)(BANAT NEWS)