Sunog sa Labangon usa patay, 2 angol

CEBU, Philippines – Usa ang patay ug duha ang angol sa nahitabong sunog sa Tres de Abril, Barangay Labangon ning Dakbayan sa Sugbo kagahapon sa buntag.

Nadawat sa kabomberohan ang maong alarma alas 2:32 sa kaadlawon ug hingpit nakontrolar alas-3:25 kaadlawon.

Matud pa ni Chief Inspector Noel Nelson Ababon, Fire Marshal sa Dakbayan, ang sunog nagsugod sa panimalay ni Mario Abella, 65, kinsa maoy nakalas.

Gibanabang P400 mil ang danyos  sa naugdaw nga napulo ka balay nga ginama sa light   materials.

Sumala pa ni Ababon, duha ka mga tawo usab ang naangol, ang 34-anyos nga babaye nga nakaangkon og 1st degree burn sa likod ug pito ka buwan nga batang lalaki nga nakaangkon og 1st degree burn sa walang kamot ug likod.

Matud ni Ababon naglisod sila pagpasulod sa fire trucks tungod walay dalan mao nga gisumpay-sumpay nila ang mga fire hoses aron makaabot sa fire scene.

Samtang usa ka Randy Pasquejo Manigo, 26, taga Salvador Extension, sa maong barangay ang gisikop human nagpakaaron-ingnong bombero.

Matud ni Ababon, atol sa kainit sa kombate sa kalayo, nakamatikod ang mga fire volunteers sa Barangay Mabolo sa usa ka lalaki nga nagdala-dala og backpack.

Sama sa regular nga bombero, nagsul-ob kini og fire proof jacket, t-shirts sa BFP (Bureau of Fire Protection) apan nagduda sila tungod kay naka shortpants ra kini.

“Pagpangutana karon, niingon nga volunteer siya sa Labangon, nisamot ilang pagduda kay BFP iyang sinina unya volunteer ra diay siya,” sigun ni Ababon.

Nagduda silang Ababon nga adunay planong mangawat sa mga nasunogan ang maong lalaki sanglit nagdala kini og dako nga bag, hinuon walay sulod ang bag niini dihang giablihan.

Si Senior Police Officer 1 Edmund Tiempo, desk office sa Labangon Police, mibutyag nga notadong kawatan sa Labangon si Manigo, gani niadtong miaging tuig lang kining nakagawas gikan sa Cebu City Jail.

Butyag niini nga pagpanglungkab og balay gyud ang tirada sa maong suspetsado.

Pasakaan og kasong usurpation of authority si Manigo kinsa anaa karon sa detention cell sa Labangon Police Station. (Camille Pateres/IBM)(BANAT NEWS)