Cabrera: Sapa sa Lahug daghan ug basura kompara sa Bulacao

CEBU, Philippines — Ang hepe sa Cebu City Environment and Natural Resources Ma. Nida Cabrera nihulagway nga mas hugaw ang sapa sa Barangay Lahug ikompara sa Barangay Bulacao parehong sa Dakbayan sa Sugbo.

Matud ni Cabrera nga sa 11 ka kilometros nga sapa mas daghan ang ilang nakuha nga basura ikompara sa sapa sa Bulacao nga adunay gitas-on nga 17 ka kilometros.  Kasagaran sa nakuha nga basura sa kapin 2 mil ka volunteers sa sapa sa Lahug mao ang plastik ug mga dahon sa lubi.

Apan ang Upper Laguerta maoy namatikdan ni Cabrera nga hugaw kaayo base sa gidaghanon sa basura nga nakuha gikan sa maong lugar.

Apan nalipay si Cabrera sa suporta sa opisyales ug mga residente sa barangay kinsa nitabang og limpiyo.

Matud usab ni Cabrera nga ilahang lain-lainon ang mga nakuha nga basura ilabi na kadtong mga plastik.

Ang buhatan sa CCENRO mopahigayon og information education campaign aron dili na manglabay og sagbot ang katawhan diha sa sapa.

Human niini sugdan na pag-isyu og citation ticket kadtong masakpan nga molabay og basura  diha sa bisan asa nga lugar base sa City Ordinance No. 2398  kun “The Septage Management Ordinance”.

Kadtong masakpan nga makalapas sa maong ordinansa makabayad og multa nga P1,000, P3,000 ug P5,000, sa una, ikaduha, ug ikatulong higayon. (/BDB)(BANATNEWS)