Dagat sa San Fernando i-rehab

CEBU, Philippines — Tinguha karon sa Bureau of Fisheries and Aquatic Resources-7 nga ipaubos sa rehabilitation ang kadagatan sa Sitio Baho, Barangay Balud sa Lungsod sa San Fernando human napuhag ang piggery nga milabay sa ilang hugaw deretso sa dagat diin aduna nay technical team nga misusi sa water quality sa dagat.

Si BFAR-7 regional director Alfeo Piloton miingon nga napasaka naman sa National Bureau of Investigation ang kaso batok sa nanag-iya sa maong piggery, magpaabot nalang sila sa resulta niini kay ang ilang concern mao ang tubig sa dagat diin basi sa Clean Water Act, ang ilang buhatan maoy primary agency nga mosusi niini.

Sumala ni Piloton, ang hugaw nga direktang gilabay sa dagat, contributory factor kini sa polusyon hinungdan nga nimenos ang isda sa dapit nga maoy kuhaanan sa gagmayng mananagat.

Nasayran nga sa labing uwahi nilang pagsusi sa tubig sa dapit, nakita sa chemical analysis nga adunay  kontaminasyon sa Ammonia ug Phospate. Negatibo hinuon kini sa Nitrate, hinungdan nga padayon karon ang pagpahigayon sa ilang technical team ug pagtuon sa lugar. (/DILT)(BANATNEWS)