Mga sugarol sa Talisay pangdakpon
CEBU, Philippines — Giklaro sa pangu sa kapulisan sa Syudad sa Talisay nga way permit nga makapugong kanila sa pagsikop sa mga tawo nga padayon nga magduwa og baraha ingon man mahjong.
Kini maoy silbing tubag ni Supt. Marlu Conag, hepe sa kapulisan sa Syudad sa Talisay labot sa pangutana sa mga sugarol kun nganung dakpon sila nga aduna man silay permit nga nakuha gikan sa barangay.
Nagkanayon si Conag nga kun estriktuhon gyud ang balaud wala silay ilhon nga permit.
Apan sila muhatag lang og higayon sa mga sugarol panahon nga adunay bilaran.
Asoy pa ni Conag nga ubay-ubay na gyud sila nga nadakpan sa ilegal nga sugal sama sa swertres, jai-alai, duwa sa baraha, mahjong ug tigbakay.
Matud pa niya nga usa kini sa gihingusgan sa labing taas nga opisyal sa nasud nga Pilipinas kay lagi ang mga anak sa mga sugarol mapasagdan naman lang. Aduna say pipila ka higayon nga ang sugal mao kini hinungdan sa krimen.
Giawhag ni Conag ang mga sugarol nga undangon na nila ang bisyo ug mubobu sa ilang panahon sa pag-atiman sa ilang pamilya aron dili masulod sa bilangguan ug makamulta og dako nga kantidad. LPM (BANATNEWS)
- Latest