2 ka tanod “gun-for-hire” sa kabukiran

CEBU, Philippines —  Gipasidunggan sa Police Regional Office-7 ang polis nga naangol atol sa nahitabong pinusilay sa bukirang barangay sa Lusaran, Dakbayan sa Sugbo niadtong Biyernes sa gabii.

Si Chief Superintendent Debold Sinas maoy mihatag sa Medalya ng Sugatang Magiting ngadto kang  Pulgo kinsa kasamtangan pang nagpaalim sa tambalanan.

Nasayran nga nakalas ang mga barangay tanod sa Lusaran nga sila si Renato Bughaw Goc-ong ug Reynaldo Laguna, atol sa dungan nga pagsilbi og search warrant sa kasong paghupot og ilegal nga armas batok nila, kini human nanukol sa polis.

Lakip nga namatay ang asawa ni Renato nga si Emma human iyang gigakos ang iyang bana aron panalipdan.

Gibutyag ni PRO-7 direktor PCSupt. Debold Sinas nga courier ang duha ka tanod sa usa ka notadong drug pusher sa lugar.

"They're suspected na isa to sa mga street level couriers nga mag-transfer (og drugs)… pag street level na vendors ng shabu ug protector mao ni kusog mangaway," matud ni Sinas.

Nunot sa maong panghitabo, matud ni Sinas nga hayan moubos na ang pinalitay og drugas sa lugar.

Sigon sab sa hepe sa CMFC nga si PCIns. Chuck Barandog nga basi sa ilang pakisusi nga silang Renato ug Laguna notado nga gun-for-hire.

"Kanang mga tawhana, they are gun for hire sa bukid for so many years, grupo na sila. Last barangay election last year? Katong mga reklamo sa bukid nga naay armed group nga sighted? Sila to, sila tong grupoha," butyag ni Barandog.

Mitumaw ang reklamo sa anak nilang Goc-ong nga nag-ingon nga human sa pinusilay, mitahan na ang iyang amahan apan gipusil gihapon kini sa mga operatiba. Apan gihimakak kini ni Barandog.

Asoy niini nga dihang nagpaila sila kang Emma nga mga polis ug magsilbi og search warrant batok sa iyang bana, giingong misulod kini sa balay ug nanira.

Wala nay nahimo ang polis ug giransak nila ang panimalay niini.

Sa pagsulod ni Pulgo aron susihon ang sulod, matud pa gipusil siya ni Renato ug maayo na lang nga nakasul-ob siya og bulletproof vest, apan nalagpot siya nunot sa kakusog sa impact sa bala.

"Nakasabot kaayo mi sa feelings sa anak atong namatay, kinsa man guy polis nga gusto nga ma ingun ato nga naa mamatay?wala gyud oy. Kanang ilang allegation alibi nalang na" dugang ni Barandog.

Magpahigayon gihapon og internal investigation ang kapolisan aron masuta kon aduna bay nalapas nga tawhanong katungod ang mga operatiba, sigon ni Sinas.   DILT (BANATNEWS)