Dugang ‘ecstacy’ ‘cocaine’ gikan ni Rosales

CEBU, Philippines —  Mga kagrupo ug mga suki nga high-end clubs ni Ken Kenneth Rosales natumbok na sa kapolisan. Samtang, dugang mga ecstasy ug cocaine napalgan sulod sa laing sakyanan nga Mercedes-Benz ni Rosales.

Si Police Regional Office-7 director Debold Sinas nagkanayon nga si Rosales maoy supplier sa mga clubs ug uban pang mga party sa Sugbo.

"We believe based sa diagram, Kenneth is the main supplier sa Cebu, and believed nga supplier siya ni Ashley sa Plus 63 (nga party)," si Sinas nagkanayon.

Nasayran nga dead on arrival dihang gidala sa tambalanan si Rosales human siya giingong nakigpinusilay sa mga operatiba niadtong miaging semana nunot sa gihimong follow-up operation.

Matud sa Regional Special Operations Group nga sa wala pa mamatay si Rosales mitug-an kini nga aduna pa siyay laing supply nga gitagoan sa iyang Mercedes Benz nga nakaparada sa iyang panimalay sa Banilad.

Tuod man, nadiskobrehan sa mga operatiba ang lima ka pakete sa nagkadaiyang kolor nga tabletas nga gituohang mga ecstasy. Aduna usab upat ka pakete sa gidudahang mga cocaine.

Ang naasoy nga sakyanan gipaubos usab sa imbestigasyon dihang nasuta nga lain ang ngan nga nakarehistro.

Nasayran nga niadtong tuig 2013, nadakpan na sa buy-bust si Rosales tungod gihapon sa pagpamaligya og party drugs.

Matud ni Sinas nga kaniadto, user ug small time pusher lang kini apan sa dihang mikusog ang iyang negosyo, mi-level up kini ngadto sa pagka big time supplier sa mga high-end clubs ug party diin lakip na sa iyang baligya mao ang cocaine.

Giingong natumbok na nila ang mga suki nga club niini sa Dakbayan sa Sugbo apan dili pa nila kini ibutyag sa publiko.

Ang tigpamaba sa Philippine Drug Enforcement Agency-7 nga si Leia Albiar una nang miigon nga mag-uga ang tutunlan sa mga moinom og ecstasy hinungdan nga ganahan sila moinom og mga fluids.

Sa party drug matrix sa Regional Intelligence Division, adunay iyang mga galamay si Rosales.

Gawas niini, giingong adunay tulo ka mga babaye nga kapareho og level sa pagka-supplier ni Rosales

Apan gipugngan una ang pagpagawas sa pangalan niini aron dili masuhong ang gihimo nila karong operasyon.

Gitug-an ni Sinas nga wala sila maalarma sa pagkuyanap sa mga party drugs sanglit  dili kini susama sa shabu.

"Kung ako pa-istoryahon, not that alarming. Specific lang na lugar and specific occasions dili sya available in a daily basis. Except mga big events, big parties di pareha sa shabu nga as long as daghay supply, daghay mamalit. Kini specific kaayo ang market ini dili man ni nimo ibaligya asa-asa," dugang ni Sinas.  DILT (BANATNEWS)