Hulga gikan sa “kampo sa mga politiko”

CEBU, Philippines — Ang kandidatu pagka kongresista sa tersero distrito nga si Atty. Geraldine “Gaye” Yapha daku ang pagtuo nga kampo sa mga politiko maoy nanghulga kaniya.

Kagahapon midangop sa Cebu City Police Office si Yapha aron sab mosumiter og reklamo sanglit sa balay niini sa Brgy. Labangon napalgan ang death threat niini.

Gibutyag ni Yapha nga daku ang iyang pagduda nga politika ang motibo sa maong hulga sanglit nakabutang sa maong suwat nga pa-withdrawhon siya sa iyang kandidatura.

"Di man ta maka-name kung politician or di basta of course lets just say nga kampo lang sa politicians. Walay laing magpa-withdraw nato gud kung dili politiko gyud na. Di ta ka pinpoint kung kinsa kay wala man tay evidences ana but it comes from any of the camps," si Yapha nagkanayon.

Si CCPO director PSSupt. Royina Garma miingon nga makig-alayon sila sa Cebu Provincial Police Office sa imbestigasyon sanglit ila mang jurisdiction ang lugar nga gidaganan ni Yapha ug ang posibleng nanghulga niini.

Hinuon mihatag og mga tips si Garma kang Yapha kon unsay angay ug dili angayang buhaton ilabi na kon aduna siyay mga lakaw.

Samtang wala pa mag-request si Yapha og police security diin kinahanglan pang moagi sa Comelec, matud niini nga mas maayong mag-hire siya og private security.

Kahinumduman nga niadtong Miyerkules adunay napalgan nga kinumot nga papel ang drayber ni Yapha nga si Rex Zamora sa luyo sa pick-up niini nga sakyanan dihang iya kining gilimpyohan.

Dihang gibukhad ni Zamora ang maong papel, aduna kini duha ka bala ug adunay nakasuwat nga “withdraw or die” “2 bullets” “1-for you” “1- for driver”.

Kini nagpasabot nga pa-withdrawhon si Yapha sa iyang pagdagan karong midterm election kay kon dili, maangkon niini ang usa ka bala, ug ang usa adto sa iyang driver.  DILT (BANAT NEWS)