Otso Deretso mibisita sa Sugbo; PDP-Laban karong Domingo

CEBU, Philippines — Mipirma og kasabutan ang mga kandidatu ubos sa grupong Otso Deretso alang sa Ahon Laylayan Koalisyon diin aduna kini walo ka gitawag nga People's Legislative Agenda.

Ang maong programa naglangkub sa pagpalig-on sa agrikultura, pagbatok sa pagpaubos sa minimum age sa criminal liability, pagduso sa Anti-Dynasty Bill, Freedom of Information ug uban pa.

Ang maong koalisyon usab gilangkuban sa kinse ka sector sama sa kababayen-an, urban poor, kooperatiba, pamuo, mag-uuma, professionals/academe, senior citizens, transportasyon, kabataan, mangingisda ug uban. Gawas sa mga senatoriables, misuporta sab sa maong kalihukan si Bise Presidente Leni Robredo.

Si Margarita Fores, ig-agaw ni senatoriable candidate Mar Roxas, kinsa padayong miduso sa kalambuan sa ekonomiya mipadangat sa mensahe niini nga “paliitin ang gastos, palakihin ang kita" sa tanang aspeto sa kinabuhi.

Gilauman nga aduna pay himuon nga paglusad sa maong program sa umaabot nga mga adlaw.

Sa laing bahin, si Presidente Rodrigo Duterte gipaabot nga mangulo sa PDP-Laban Cebu Campaign Rally karong Domingo nga ipahigayon sa Plaza Independencia sa Dakbayan sa Sugbo diin tambungan kini sa tanang supporter sa tibuok lalawigan.

Ang tigpamaba sa Office of the Presidential Assistant for the Visayas nga si Titus Borromeo mipahibawo nga alas dos sa hapon karong Domingo sugdan ang kalihukan nga gituohan nilang una sa kasaysayan dinhi sa Sugbo kay gipaabot nga moabot ngadto sa 120 ngadto sa 150 mil ka mga supporters sa PDP-Laban ug mga kandidato ang motambong sa maong kalihukan uban ang presidente.

Dugang niini nga tanan senatorial candidates, guest candidates ug mga lokal nga kandidatu ang hatagan ug kahigayonan nga maka-istorya sa maong kalihukan.

Gipahibawo usab ni Borromeo nga wala pa siya masayod kon unsa pay kalihukan nga tambungan sa presidente dinhi sa Sugbo.

Iya hinuong gi-awhag ang katawhan nga motambong sa maong kalihukan nga gidili ang pagdala og mga bottled water, mahait nga hinagiban, ballpen, backpack lakip na ang pagpalupad og drones sa dapit nga pahigayonan.  Rowena D. Capistrano DILT (BANAT NEWS)