San Remigio aduna nay mental health facility

CEBU, Philippines — Hingpit na nga gi-turnover sa Office of the Vice President nga gipangulohan ni Bise Presidente Leni Robredo ang San Remigio Mental Health Facility ngadto sa lokal nga kagamhanan sa lungsod sa San Remigio.

Ang buhatan sa OVP ni download og P2 milyones nga pundo ngadto sa Lungsod sa San Remigio alang sa construction sa mental health niadtong Hulyo sa nilabay’ng tuig ug gisugdan ang construction sa buwan sa Septiyembre ug natapos niadtong Disyembre 2018.

Ang maong proyekto usa sa mga priority nga na-identified sa San Remigio nga kinahanglang hatagan og pagtagad ubos sa bridging leadership program kini human sa bagyong Yolanda niadtong tuig 2013 diin daghang mga lokal ug international organization ang nakurat sa dihang daghan sa mentally-ill patients ang gipangsulod sa tangkal.

Sa maong sitwasyon ang lungsod kauban sa Americares nagtukod og community based mental health program nga mao ang Raising Awareness of Mental Health issues ug libre nga medication sa pasyente diin sa pagkakaron adunay 210 mentally –ill individuals sa San Remigio nga naglangkub sa psychotic disorder, depression, depression with psychotic features, anxiety, epilepsy/seizure ug uban pa. Ang maong 100 square meters nga mental health facility magsilbi kining treatment center sa mga mentally-ill nga pasyente diin aduna kini upat ka holding rooms, upat ka counseling rooms ug usa ka reception area.

Matud ni Robredo nga ang maong facility makatabang og dako dili lang sa mga taga San Remigio  lakip na usab sa mga silingang probinsiya niini tungod kay aduna man sila’y kapasidad. Si Robredo mapasalamaton usab sa uban nilang mga nakita nga partner nga nitabang usab kanila alang sa pagbutang ug mga igong equipment para sa maong facility.   BDB (BANAT NEWS)