MRTSI gihangyo nga mobutang og dugang bus stops

CEBU, Philippines — Ang konseho sa Dakbayan sa Sugbo nihangyo sa Metro Rapid Transit Service Inc. (MRTSI) alang sa dugang bus stops sa Cebu City south district aron mo akumodar sa mga matanggong nga mga sumasakay.

Atol sa ilang regular session niadtong adlaw’ng Martes ang miyembro sa legislative body niaproba sa resolusyon ni Konsehal Dave Tumulak nga naghangyo sa transport company nga mo-provide og bus stops sa south district diin nakasinati og kahuot sa dagan sa trapiko.

Niumol og resolusyon si Tumulak human niya naobserbahi nga daghang pasahero ang matanggong sa traffic atol sa peak hours. Motumaw ang kahuot sa trapiko atol sa peak hours gikan sa alas 6:00 hangtud sa alas 10:00 sa buntag ug alas 4:00 sa hapon hangtud sa alas 9:00 sa gabii.

Ang kahuot sa dagan sa trapiko sa south district gumikan kini sa nagpadayon nga construction sa P638 milyones nga underpass project diha sa Natalio Bacalso Avenue.

Matud ni Tumulak nga ang buses sa MRTSI mahimong moagi sa side road sa N. Bacalso Avenue

Masaligon si Tumulak nga ang maong plano dili kini makaapekto sa panginabuhian sa public utility jeepney (PUJ).

Subay niini, giawhag ni Tumulak ang mga nanag-iya og mga pribadong sakyanan nga imbes magdala og kaugalingong sakyanan mopahimulos sa bus ride aron mamenosan ang kahuot sa trapiko.  BDB (BANAT NEWS)