P2.2 milyon reward money sa Reluya ambush

CEBU, Philippines — Mitanyag karon og P2.2 milyones nga ganti si San Fernando Mayor Lakambini “Neneth” Reluya ngadto sa tawo nga makatudlo ug maoy hinungdan sa pagdakop sa mga tawo nga ni-ambush kanila sa iyang bana diha sa Dakbayan sa Talisay sa miaging buwan.

Kagahapong adlawa maoy unang higayon nga nipakita pagbalik si Reluya sa mga tigbalita.

 Ang kapulisan nihimo og Special Investigation Task Group (SITG) sa pagsulbad sa kaso sa mga Reluya. Nigawas nga mga suspek sa pagpang ambush mao si Jerome Labitad ug ang iyang grupo. Apan si Reluya nitan-aw sa sitwasyon nga mas bug-at ang papel sa iyang kaatbang sa politika nga si Ruben Feliciano sa nahitabo kaniya, sa iyang bana nga si Ricardo “Nonoy” Reluya ug mga kaubanan.

Ang babayeng mayor nakigkita ni Chief Supt. Debold Sinas, direktor sa Police Regional Office (PRO-7) aron kumustahon ang ilang kaso.

Siya nagkanayon nga ang kamatayon ni Nonoy lisud para sa iyang karera sa politika kay ang iyang bana iyang katambayayong. Apan karon himuon niya kining inspirasyon pagserbisyo sa San Fernando.

Sa pangatuna kun naa ba sila sa listahan sa niapil sa negusyo sa ginadiling drugas nga mao ang pirmeng ibato kanila sa kaatbang sa politika mao kini iyang tubag: “If you look at my face, is this the face of a drug protector? Dili man gud na siya known. Dili pud na siya businessman. You know we are the recipient of our actions,” nagkanayon ang mayor.

Si Reluya gikatakdang operahan aron makuha ang naungot pang bala diha sa iyang wala nga bukton. Gituohang bala sa M16 rifle ang nakaigo kaniya sa dihang sila gibanhigan diha sa Barangay Linao sa Dakbayan sa Talisay niadtong Enero 22.

Naluwas siya  human siya gitabunan sa iyang banang si Nonoy.  Le Phyllis F. Antojado IBM (BANAT NEWS)