Karsada giguba aron ayuhon

CEBU, Philippines — Gibato og mga pagsaway ang karsada sa Barangay Jaclupan, Dakbayan sa Talisay human nga kini giguba aron ayuhon.

Pipila na ka mga residente sa maong lugar ang mipadangat sa ilang reklamo gumikan sa kaabog o kalapukon sa ilang agianan panahon nga mag-uwan.

Gitug-an ni Alesir Estrevello, 60-anyos, mulupyo sa dapit nga makadaghan na adunay nalamba nga mga magmotorsiklo sa lugar gumikan sa ilang karsada nga giingong ayuhon apan hangtud karon wala pa gyud kini mahuman.

Mao usa kini ang panawagan ni Luncio Batuto nga unta dalion ang pag-ayo sa maong karsada kay mao ra kini ang ilang agian matag lugsong nila sa patag.

Si Cesar Resto, usa ka habalhabal drayber miingon nga daghan gyud sa iyang mga pasahero ang magyawyaw gumikan sa sitwasyon sa karsada.

Hinuon siya nakasabot kay alang man kini sa kaayohan sa tanan apan iyang hangyo nga madali kini og trabaho kay maapektuhan sab ang ilang motorsiklo.

Gibanabana nga moabot sa kapin usa ka kilometro kapin ang gitas-on sa pag-ayo sa maong karsada.

Gisuwayan sa pagkuha sa iyang habig si Jaclupan Barangay Kapitan Marissa Orbiso sa iyang buhatan apan wala kini bisan sa iyang pinuy-anan. Ang sitwasyon sa karsada sa Jaclupan naabot nasab sa social media nga niani sab og daghang mga pagsaway.  DILT (BANAT NEWS)