Negosyante nakaipsot sa pagpamanhig

CEBU, Philippines — Usa ka negosyante ang swerte nga wala maigo sa pagpamanhig kaniya sa wala mailhing kriminal kagahapon sa buntag diha sa G. Ouano Street, Barangay Alang-alang, Dakbayan sa Mandaue.

Ang biktima mao si John Pearlnel Dinoro, 48-anyos, minyo, taga P. Burgos Street, Barangay Alang-alang sa maong dakbayan.

Gikataho nga ang biktima gikan nga naghatod sa iyang asawa sa trabahoan ug padulong na unta kining mopauli sa ilang balay aron sa pagkuha usab sa anak niini nga ihatod ngadto sa tulonghaan dihang kalit gipusil ang gisakyan niining sakyanan ug lakip na usab sa kiliran niini nga habig.

Ang mga mamumuno nakasakay kini og usa ka motorsiklo, naka-bonnet ug walay helmet nga nisugat sa sakyanan sa biktima dihang namusil kini.

Ang biktima nipasutoy sa iyang sakyanan paingon ngadto sa usa ka duol nga police station. Matud ni Chief Inspector Mercy Villaro, tigpamaba sa Mandaue City Police Office nakuha gikan sa crime scene ang kabhang sa kalibre .45, mga bala nga niigo sa sakyanan sa biktima,

Ang biktima adunay negosyo sa Dakbayan sa Toledo ug niadtong tuig 2015 pa kini giingong nakadawat og hulga sa iyang kinabuhi. Sa pagkakaron nipahigayon og lawom nga imbestigasyon ang kapolisan aron masayran ang motibo sa pagpamusil ug gisusi usab ang mga Close Circuit Television (CCTV) camera sa posibleng naagian sa biktima ug mamumuno.  BDB (BANAT NEWS)