Duterte mobisita sa Sugbo, Otso Diretso manghangyo sa mga Sugboanon
CEBU, Philippines — Gikompirma ni Presidential Adviser for the Visayas Secretary Michael Dino ang pagbisita ni Presidente Rodrigo Duterte nganhi sa Sugbo karong Domingo alang sa politikanhong kalihukan sa PDP-Laban senatorial slate diha sa Plaza Independencia.
Matud ni Dino nga atol sa maong kalihukan mahibaw-an usab kong kinsa nga mga lokal nga kandidato ang suportahan sa presidente nga tambongan usab kini sa iyang mga dumadapig.
Samtang si Cebu City Councilor Raymond Alvin Garcia nibutyag nga dad-on ni Duterte ang iyang senatorial slate ingon man ang mga adapted niya nga iyang giendorso.
Matud ni Garcia nga motambong sa maong kalihukan sila si Vice Mayor Edgardo Labella isip Chairman sa PDP-Laban sa Cebu City ug Congresswoman Gwendolyn Garcia isip Chairman sa PDP-Laban sa Cebu Province.
Sa iyang bahin, si Gobernador Hilario Davide, III nitug-an nga ang walo ka kandidato pagkasenador nga “Otso Diretso” mobisita sa Sugbo karong Pebrero 21.
Gipaabot nga manghangyo sa mga Sugboanon sila si Magdalo party-list Representative Gary Alejano, re-electionist Senator Bam Aquino, human rights lawyer Chel Diokno, Marawi civic leader Samira Gutoc, kanhi Solicitor General Florin Hilbay, election lawyer Romulo Macalintal, kanhi Deputy Speaker Erin Tañada ug kanhi senador Mar Roxas.
Matud ni Davide aduna nay representante sa maong mga kandidato nga nipahibalo sa ilang kampo ug nisaad nga mo-coordinate og balik.
Apan si Davide nagkanayon nga posibleng dili siya katambong sa pangampaniya sa maong mga kandidato tungod kay aduna sila’y kalihokan sa Dakbayan sa Talisay, Lungsod sa Minglanilla ug Dakbayan sa Naga. (Rowena D. Capistrano ug Le Phyllis F. Antojado/BDB)(BANATNEWS)
- Latest
