Drug war naabot dinhi?

CEBU, Philippines — Pagpamanhig nga gikamatay sa 26- anyos nga lalaki sa Barangay Pit-os, Dakbayan sa Sugbo niadtong miaging adlaw giingong konektado sa nahitabong drug war sa mga sindikato didto sa Samar.

Niadtong Domingo sa hapon gibanhigan patay ang usa ka Joselito Junio, 26, ug kasamtangang nagpuyo sa Camella Subdivision Riverwalk sa maong barangay.

Ang direktor sa Cebu City Police Office nga si Police Senior Superintendent Royina Garma miingon nga adunay kalabutan sa illegal drug trade ang biktima gawas sa rehiyon.

“I received an information na involved siya sa illegal drugs outside region 7 medyo malalim ang network niya and link niya,” butyag ni Garma.

“So we are now considering maybe it’s a drug war between groups because lumabas siya sa operation niya sa Samar at pumunta siya dito alam mo naman ang competition sa drugs,” dugang niini.

Ang maong direktor nagkanayon nga makig-alayon sila sa mga polis sa Samar aron matumbok ang posibleng suspek sa maong krimen.

Samtang, sa linaing interview miingon ang hepe sa Talamban Police Station nga si Chief Inspector Elisandro Quijano nga mo usa ka tuig na ang maong biktima sa ilang gipuy-an sa Pit-os apan wala makamatikod ang ilang mga silingan nga aduna kini nakaaway.

Sanglit dili kini mokooperar kun adunay pulong-pulong sa home owners association.  Sa pagkakaron, ilang gitan-aw ang cellphone sa biktima aron masuta kun kinsa ang mga posibleng adunay motibo sa pagpatay niini.

Sa inisyal nga imbestigasyon nasuta nga duha ka pares sa riding-in-tandem ang mitira sa biktima.  Ang duha ka mga angkas maoy mipaulan og bala sa itom nga Innova nga sakyanan niini.

Matud pa nga nakagawas ug nakadagan pa ang biktima apan gigukod ug gitiwasan. (/IBM)(BANATNEWS)