Gen. Maxilom cor. M.J Cuenco adunay smart traffic system
CEBU, Philippines — Ang Cebu City government mangayo og report sa kompaniyang Leotek alang sa implementasyon sa Intelligent Traffic System sa may Gen. Maxilom Ave. corner M. J Cuenco Ave.
Si konsehal Jerry Guardo miingon sa Banat News nga mopadala siya og sulat ngadto sa maong kompanya nga naghangyo kanila sa pagsumiter sa report sa duha ka bulan nga pagpatuman sa traffic system.
Ang Leotek gilauman sa paghuman sa test run alang sa smart traffic system karong buwana.
Niadtong Disyembre 2018, ang kagamhanan sa siyudad miduol sa Leotek aron mapalambo ang traffic system sa dakbayan nga maoy unang problema nga giatubang sa siyudad.
Sa giingong test run walay gasto ang city government niini.
Ang Leotek nag specialize og Smart Street Lights and Smart City solutions’ sama sa advanced LED street lights nga adunay mga sensors, cameras ug uban pa.
Ang Taiwan-based nga kompanya nagbutang og CCTV cameras alang sa pag-monitor ug pag-analisar sa mga kahimtang sa traffic flow.
Kini usab makatabang sa Cebu City Transportation Office (CCTO) sa pagpatuman og silot ngadto sa mga traffic violators bisan og walay enforcer nga nagbantay.
Si Guardo miingon nga angay siya mangayo og update aron sa pag-evaluate nila sa CCTO sa operasyon.
Siya midugang nga kon ang pagpatuman sa smart traffic system malampuson, lagmit irekomendar niya kini sa kagamhanan.
“Last time nag communicate ko nila, they have encountered problem transmitting the data from Taiwan to Cebu, I learned they plan to hand carry to bring the data here in Cebu,” saysay pa ni Guardo. (/DILT)(BANATNEWS)
- Latest
