Ikaduhang bidding sa pagpalit og mga bus ipahigayon

CEBU, Philippines — Ang kagamhanan sa Dakbayan sa Sugbo mag-schedule kini sa ikaduhang public bidding sa pagpamalit og 19 ka 50-seater nga bus niining buwana.

“After sa mandatory review sa end user which is kami ra gihapon, within the day kung mahuman siya ma-publish siya ugma count ta og another seven days then schedule na sad ta”, matud sa pangulo sa Department of General Services ug pangulo sa Bids and Awards Committee Ronald Malacora.

Kahinumduman nga gideklarar sa BAC nga failure of bidding ang unang bidding nga ilang gipahigayon niadtong niaging semana gumikan kay wala’y niapil nga mga supplier sa bidding sa P152 million nga pagpalit sa 19 ka bus. Nasayran nga ang 18 sa 19 ka bus i-charge sa annual budget karong tuiga samtang ang usa ka bus adto i-charge sa Supplemental Budget-4 sa niaging tuig.

Gipasabot ni Malacora nga ang mga bus nga paliton maoy gamiton sa free ride nga gimando ni Mayor Tomas Osmeña kanila sama sa libreng pagpasakay sa mga nagtrabaho sa Business Process Outsourcing (BPO) ug ubang mga trabahante.

“Naa pud tay mga nakita nga ubang areas nga nagkinahanglan sad og ayuda sa atong mga buses labi na panahon sa buntag kay grabe ang sakay, kanang 19 kabuok mao nay atong i-deploy in addition sa atong existing fleet nga 20 sad na sila karon ang atong gipadagan nga daan nga mga buses”, pasabot ni Malacora. Dugang ni Malacora nga sa pagkaron ang siyudad adunay 20 ka bus ug magkuwang gyud kini gumikan kay ang uban niini karaan na ug magsige kini og kaguba ug dili sila ka siguro nga moserbisyo kini og dugay. (BANAT NEWS)