Reluya mao gihapon ang mayor sa San Fernando —DILG
CEBU, Philippines — Gihimakak sa Department of Interior and Local Government (DILG)-7ang report nga giingong niisyu sila og memorandum circular nga nagdeklarar nga dili na makabalik si Reluya sa iyang pwesto isip mayor sa lungsod.
Giingong adunay nikatap nga text messages diha sa social media nga nipasangil kang Reluya nga konektado kini sa ilegal nga drugas.
Ang maong mensahe nagkanayon nga “UNDER NEW DILG MEMO CIRCULAR: Mayor Reluya can no longer [return] to her post as mayor [because] she is involved in illegal drugs... as a drug protector. [Please] pass the message of DILG”.
Ang maong mensahe nitumaw human sa pipila ka semana sa nahitabong pagpamanhig sa magtiayong Reluya ug sa ilang mga kauban.
Sa maong pagpamanhig patay diha-diha ang iyang bana nga si Association of Barangay Council Ricardo Reluya, Jr., lakip ang drayber nga si Allan Bayot ug ang staff sa mayor nga si Ricky Monterona.
Si Lakambini ug laing duha nila ka kauban ang naka-survive sa maong pagpamanhig.
Si Lakimbini nidagan pag-usab isip mayor sa lungsod karong umaabot midterm election sa Mayo 13 diin ang iyang bana mao unta ang iyang running mate.
Ang DILG-7 niklaro ngadto sa publiko nga wala kini gipagawas o giluwatan nga memorandum batok kang Reluya.
“It would be impossible that the circular came from our department because we don’t have the list of those drug-related personalities”, matud ni Atty. Ian Kenneth Lucero sa DILG-7.
Nunot niini, gihimakak usab sa DILG nga nipagawas sila og kamanduan nga si Lakambini hulipan kini sa iyang posisyon.
Giklaro usab sa maong departamento nga si Reluya gihapon ang mayor sa Lungsod sa San Fernando. Ang DILG niawhag sa publiko nga likayan ang pag-share sa maong text message aron dili mokatap ang sayop nga impormasyon. (/BDB)(BANATNEWS)
- Latest
