Drayber ni Reluya ilubong ugma

CEBU, Philippines — Ilubong na ugmang adlawa ang drayber ni San Fernando Mayor Lakambini “Neneth” Reluya nga si Allan Bayot.

Lakip si Bayot sa namatay sa nahitabong ambush uban sila si ABC president Ricardo “Nonoy” Reluya Jr. ug Tourism officer Ricky Monterona niadtong miaging semana.

Dungan unya sa paglubong niini, mao ang panawagan sa iyang kabanay nga makab-ot na ang hustisya sa kamatayon niini.

Matud nila ni Ellaine ug Baby nga unta mahatagan og hustisya sa daling panahon ang kamatayon sa ilang maguwang ug masayran sa dali nga panahon ang mga nagpaluyo niini kay luoy kaayo ang ilang igsuon nga ilang gihulagway nga buotan ug naningkamot aron ibuhi sa iyang pamilya.

Gibutyag sa magsuon nga subay sa sunod-sunod nga nahitabong patay sa San Fernando, nibati sila og kabalaka ni Allan. Apan giingong wala mahadlok ang ilang maguwang ug nangatarungan pa kini nga dili sila hilabtan sa iyang mga amo kay wa man silay sala.

Nanawagan sila karon sa mga nakakita sa hitabo nga motabang sa imbestigasyon sa kapolisan.  DILT, (BANAT NEWS)