Duha patay didto sa pagpamusil sa Minglanilla

CEBU, Philippines – Patay ang duha ka mga batan-on human kini mabiktima sa pagpamusil sa wala mailhing mamumuno didto sa Purok Lemon Grass, Barangay Tubod sa lungsod sa Minglanilla.

Ang duha nga nakalas nga sila si Rico Polo Padios, 18, ulitawo  ug Exequiel Dejos, 20, ug residente sa maong lungsod. Nahitabo ang pagpamusil sa alas-3 sa kadlawon.

Si Police officer 3 Junyl Atir, Desk Officer sa Minglanilla Police Station miingon nga nakadawat sila ug inpormasyon may kalabutan sa giingong nakit-an nga patay na lawas.

Base sa initial nga imbestigasyon sa ilang kapolisan, adunay nitaho sa barangay hall sa Tubod nga adunay nagpabuto sa armas sa daplin sa sapa ug sa pagsusi niini nakit-an na lang ang duha ka mga biktima nga wala nay kinabuhi ug adunay mga samad sa ulo ug lawas agi sa pagpamusil.

Miingon si Atir nga walay makatumbok sa mamumuno kay basi sa mga nakasaksi nakataptap kini sa nawong.     

Padayon pa karon nihimo ug pakisusi ang kapulisan kung unsay motibo sa pagpamusil lakip ang pag-ila sa mamumuno.

Walay mga kabhang sa bala nga nasakmit sa crime scene. - /LPM (BANAT NEWS)