Uyab sa dalagitang na-overdose gipangita na

CEBU, Philippines – Giila na nga Person of Interest ang uyab sa 19-anyos nga dalaga kinsa giingong na-overdose og usa ka matang sa drugas sanglit siya maoy katapusang kauban sa biktima atol sa concert nga ilang giadtuan.

Gibutyag ni Police Regional Office-7 director PCSupt. Debold Sinas nga gipangita na nila karon ang maong lalaki aron makuhaan sa iyang habig.

Kagahapon giingong pormal na nga misang-at og reklamo ang ginikanan sa biktima aron masugdan na sa kapolisan ang imbestigasyon.

Giangkon ni Sinas nga maglisod sila og tumbok kon overdose sa ecstasy ba ang hinungdan sa kamatayon sa dalaga sanglit basi sa gihimong pakisusi sa doktor, wala gitumbok niini kun unsa nga matang sa drugas ang ilang nakita.

“…ang istorya overdose of a certain drugs. Yung ecstasy came in sa social media na,” sigon ni Sinas.

Matud ni Sinas nga ilang awhagon ang pamilya sa biktima nga ipa-autopsy ang ilang anak sa PNP Crime Laboratory kay kuwang kaayo ang giluwatan nga findings sa doktor.

Mangayo sab sila sa expertise sa Philippine Drug Enforcement Agency-7 aron sa pagtumbok kon unsa nga matang sa drugas ang nakapatay sa biktima.

Subay niini ang tigpamaba sa PDEA-7 nga si Leia Albiar-Alcantara mipadayag nga andam silang makig-alayon sa kapolisan.

Si Sinas midugang nga kon matumbok nga party drugs gyud ang nakapatay sa biktima, hayan sugdan na nila ang pagsubay sa mga party drug suppliesr nga anaa sa ilang watchlist. (/DILT)(BANAT NEWS)