BFAR wala pay advisory kabahin sa kinhason sa Talisay

CEBU, Philippines – Ang Bureau of Fisheries and Aquatic Resources (BFAR)-7 niklaro nga wala pa sila nakadawat og report nga dili luwas kan-on ang mga kinhason ug isda gikan sa kadagatan sa Dakbayan sa Talisay human nga usa ka kompaniya sa lugar ang nipagawas sa ilang hugaw nga tubig direkta ngadto sa kabaybayonan sa Barangay Dumlog sa maong dakbayan.

Matud ni Alma Saavedra, tigpamaba sa BFAR-7 nga nakadungog na sila sa maong taho apan wala pa sila nakadawat og report nga dili luwas kan-on ang mga kinhason gikan sa kadagatan sa maong lugar.

Dugang ni Saavedra nga makig-alayon sila niini sa Environmental Management Bureau (EMB)- 7 ug Department of Environment and Natural Resources (DENR)- 7.

Sa laing bahin, luwas ug walay angayan nga kabalak-an sa pagkaon og isda matud sa BFAR kini sukwahi sa mga taho nga nikatap diha sa social media nga dili luwas ang pagkaon og isda.

Si Saavedra nagkanayon nga nagpagawas na sila og advisory nga luwas ug walay kahadlokan sa pagkaon og isda. (Joevelon G. Pinay /BDB)(BANAT NEWS)