Mga komitiba sa Sinulog 2019 gi-terminate na

CEBU, Philippines – Gi-terminate na kagahapon ang tanang komitiba sa Sinulog 2019  human sa gipahigayong formal termination of multi-agency coordinating center for Sinulog 2019 diha sa Cebu City Social Hall.

Nitambong sa maong kalihukan ang direktor sa Police Regional Office (PRO)-7 Chief Superintendent Debold Sinas, direktor sa Cebu City Police Office Senior Superintendent Royina Garma, Sinulog executive committee chairman Konsehal Dave Tumulak, Reverend Father Aladdin Luzon, OSA nga maoy pangulo sa peace and order sa Fiesta Senior sa Basilica Minore del Santo Niño ug uban pa.

Si Sinas nibutyag nga nagpahigayon sila og final assessment sa Sinulog Festival 2019 diin duna sila’y debriefing, impressions, critics, observations, recommendations alang sa angayang pauswagon sa Sinulog sunod tuig.

Matud ni Sinas nga silang tanan niuyon nga ang Sinulog 2019 malampuson apan aduna sila’y nakit-an nga angayan pang palambuon apan wala kini mohatag pa og detalye kabahin niini.

Samtang si Padre Luzon nidayeg sa gihimo sa kapolisan ingon man sa ubang ahensiya sa gobiyerno nga nitabang sa pagbantay sa seguridad sa kapistahan sa balaang bata.

Sa iyang bahin, si Konsehal Dave Tumulak nihulagway nga ang law enforcement agencies ug government agencies nihimo gyud sa ilang trabaho aron makab-ot ang gitinguha nga malinawon, hapsay ug malampuson nga Sinulog 2019.

“Changes nga ipatuman next year gamay ra kaayo. We have also to admit dili to siya ingon wala makontrolar ang tawo, this year is lahi ni nga Sinulog because gihatagan nato og higayon ang mga spectators outside sa atoang Cebu City Sports Center nga makakita sila sa atong Sinulog kay intended ni para sa mga tawo”, dugang ni Tumulak. (/BDB)(BANAT NEWS)