Tulo nasakmitan og armas ug shabu

CEBU, Philippines – Tulo ka tawo ang nasikop gumikan sa paghupot og armas ug ubay-ubay ang nadakpan gumikan sa ilegal nga drugas atol sa gipahigayon nga buy bust operation ug pagpatuman sa COMELEC gun ban.

Sa unang operasyon, pinasikad sa search warrant nga nahitabo alas 6:30 sa buntag, nasikop si Alfonso Buot, alyas Jun Buot, 53-anyos, minyo, taga Brgy. Baliwagan, Lungsod sa Balamban. Nakadawat og taho ang kapolisan gikan sa concerned citizens bahin sa paghupot ni Buot og armas.

Nasakmitan kini og usa ka kaliber 45 nga pistola, magazine ug tulo ka buhing bala.

Nasikop sab sa susamang lugar si Allan Lopez, kinsa nakuhaan og 250 gramos nga gituohang shabu nga mobalor og P1.7 milyon, duha ka improvised shotgun ug tulo ka buhing bala.

Sa Lungsod sa Ronda, nasikop si Geofrey Bronola, sa Sitio Katutay, Barangay Kan-abuhon human sa pag-implementar sa search warrant nga giisyu ni Judge Leopoldo Cañete sa Branch 60 sa Barili Cebu. Ang maong operasyon gipangulohan sa PIB, PDEU, PMFC nga gipangulohan ni PCInsp. Christopher Rey Natnat.

Nasakmit gikan kang Bronola, ang usa ka 22 magnum revolver nga adunay 9 ka buhing bala, air gun riffle, air gun magazine, ug uban pa nga mga nagkadaiyang armas.

Sa gihimong anti-drug operation sa Dakbayan sa Sugbo, ang unang operasyon nahitabo sa Sitio Trinidad, Brgy. Punta Princesa, Cebu City alas sais sa buntag niadtong Martes, diin nasikop sila si Jimmyboy Tabares, taga Brgy. Quiot, ug Gaodioso Tabares. Nakuhaan sila og 9 ka gramos nga gituohang shabu nga mobalor og dul-an sa P62 mil, usa ka .38 kalibre nga armas ug buy-bust money.

Ikaduhang operasyon gihimo gihapon sa Brgy. Punta Princesa pagka alas 7:55 sa buntag diin gidakop si Benedict Codezar, 29-anyos, ulitawo, walay trabaho, ug si John Medalla, 29-anyos, walay trabaho ug residente sa Sitio Lantawan Brgy. Quiot. Nakuha gikan kanila ang 7 ka gramos nga drugas nga mobalor og dul-an sa P48 mil ug buy-bust money.

Sa Lungsod sa Liloan, nasikop sa kapolisan niadtong miaging gabii ang giilang pusher sa Sitio Bakante, Brgy. Tayud nga si Jayme Auman Tagalog, 29-anyos.

Matud ni OIC police station chief PCInsp. Danilo Colipano nga nakadawat sila og mga taho labot sa ilegal nga operasyon sa dinakpan.

Nakuhaan si Tagalog og pinaketeng shabu nga miabot og napulo ka gramo ug nagkantidad og P68 mil.

Nagtingkagol na karon sa prisohan ang mga dinakpan samtang nagpaabot nga pasakaan og tukmang kaso. (Rowena D. Capistrano/DILT)(BANAT NEWS)