141 nga way disiplina gisikop

CEBU, Philippines — Bisan sa mga sayong pahimangno alang sa luwas ug hapsay nga Sinulog Grand Parade aduna gihapoy 141 ka mga tawo ang gipangdakop sa kapolisan tungod sa pagpabadlong sama sa pag-inom, pagkiat-kiat ug eskandalo sa publiko.

Sumala pa ni Police Senior Supt. Royina Garma daghang mga niduyog sa selebrasyon nga walay mga disiplina sa kaugalingon. Sagad kanila nadakpan sugod sa alas 10 sa gabii samtang gipatuman ang liquor ban tibuok gabii hangtud kagahapon sa buntag.

Ang napulo sa mga nangadakpan nagpailang mga menor de edad. Lakip sa mga nadakpan ang unang gidakop nila nga nagitsa-itsa og sapatos atol sa parada diin mitugdon atubangan nilang Garma ang maong sapatos.

"I understand na party mode talaga pero may iba kasi na sobrang nag-wild na and nadadamay ‘yung mga peaceful lang na nanunuod ng parade," sigun ni Garma.

Kapin 500 ka mga polis ang gipakatap nga ang tumong mao ra gyud ang pagsikop sa mga nakalapas sa liquor ban sulod sa perimeter radius sa gipahigayonan sa parada.

Matud niya mas daghan pa gyud unta silang pangdakpon kun wala pa gibalik ang signal sa mga cell sites sanglit naka-text brigade dayon kadtong mga unang nangadakpan mao nga kadtong uban nangundang sa pag-inom.

Gawas nga gipabayran og P500  nga multa ang maong mga dinakpan, gikuhaan sila og mugshots ug mga finger prints aron aduna na silay rekord sa kapolisan.

Usa sa mga nadakpan si Michael Lagahit, 30, residente sa Gorordo, matud niya nga naninda ra siya og barbecue apan giapil siya og dakop bisan wala siya nagpainom sa iyang mga kustomer.

"Di sad mi ka blame sa polis kay trabaho man na nila pero unta tarungon unta ba kay maangin ‘tong wala gyud niinom," sigun ni Lagahit.

Giangkon hinuon sa usa sa mga dinakpan nga silingan ra sab ni Lagahit nga si Ramon Roda, 35, nga nag-inom sila kauban sa iyang walo ka mga higala.  "Naggunit ko’g baso kay akoy gunner, unya naabot mang polis gidakop ko wa pa gale ko kainom," sigun pa niya.

Sa sunod nga Sinulog, misugyot si Garma nga pamub-an na lang ang rota sa grand parade aron dali ra mahuman. Buot sab niya nga did-an ang mga dancers ug mga artista nga mangitsa og mga souvenirs nga maoy hinungdan nga magkagubot ang mga nanan-aw.

Nanghinaot siya nga hasta payong idili na sa sunod Sinulog kay dunay mga nanan-aw sa luyo nga nangasuko sa mga nanan-aw  sa atubangan dili sila kakita tungod sa payong.

Apan bisan pa man niini, gikonsiderar gihapon ni Garma nga malinawon ang Sinulog niadtong Domingo.

"The whole day event yesterday (Domingo), I will consider it as successful and generally peaceful kasi nobody got hurt even if may mga kunting commotion medyo nag-wild lang ‘yung mga tao sa tuwa siguro and we were able to disperse them peacefully without hurting anyone," sigun ni Garma. (BANAT NEWS)