Ginang nakuhaan og P8.5M shabu

CEBU, Philippines — Mokabat P8.5 milyones balor sa ilegal nga drugas ang nasakmit atol sa pagsilbi og search warrant sulod sa Camella Homes, Barangay Lawaan, Dakbayan sa Talisay niadtong Sabado sa buntag.

Ang dinakpan giila nga si Lita Reyes Montillano alias Clarisse ,43, nagpuyo sa maong dapit.

Base sa report sa Cebu Provincial Police Office- Provincial Intelligence Branch nakuhaan ang suspek og 1.25 ka kilong shabu diin gibana-bana nga mobalor na og P8.5 milyones.

Sumala pa sa direktor sa CPPO nga si Police Senior Supt. Manuel Javier Abrugena miingon nga nadakpan sa mga ahente sa Philippine Drug Enforcement Agency-7 niadtong tuig 2016 ang bana ni Montillano nga si Henry tungod gihapon sa kaso sa ilegal nga drugas.

Giingong human nga nadakpan ang bana niini, si Lita na ang nipadayon sa maong ilegal nga negosyo nga gibiyaan sa iyang bana.

Si Lita naapil sa listahan sa mga high value target sa tibuok probinsya sa Sugbo ang maong ginang.

“Nung nakulong na si Henry, siya nagbigay ng instruction kung sino ang bibigyan so siya yung nagpatuloy,” sigun ni Abrugena.

Sa laing operasyon, usa ka 24-anyos nga lalaki  ang nadakpan ug nakuhaan og illegal nga drugas atol sa gipahigayon nga buy bust operation sa may Sitio Bugnay II, Barangay Labangon ning Dakbayan sa Sugbo.

Ang dinakpan naila nga si Mark Anthony Sabellano, ug residente sa maong lugar. Nangulo sa maong operasyon mao si Police Chief Inspector Keith Allen Andaya ug mga kaubanan.

Nasakmit gikan kang Sabellano ang mga pinutos sa ginadili nga drugas nga motimbang ug 20 gramos nga mobalor og P136 mil base sa dangerous drug board value, P400 nga gituohang halin, ug lakip ang buy bust money.

Samtang nasikop usab diha sa Lower Jugan,  Lungsod sa Consolacion si Melanio Labeste Jr., 25, nagpuyo sa maong dapit. Giilang bag-ong pusher sa maong dapit ang suspek kinsa nakuhaan og pito ka gagmay nga paketeng shabu. (BANAT NEWS)