Duha ka langyaw nga nitan-aw sa Sinulog nakuotan

CEBU, Philippines — Duha ka langyaw ang nabiktima sa pagpanguot atol sa Sinulog grand parade kagahpon diha sa uptown area Dakbayan sa Sugbo.

Unang biktima mao si Cheuk Bond Kwan, 28-anyos, Chinese national, lumad nga taga Hong Kong ug nibisita dinhi sa Sugbo alang sa pagtan-aw sa Sinulog,

Nadala sa wala mailhing kawatan ang Note 8 nga cellphone ni Kwan.

Atol sa pagkahitabo sa maong insidente si Kwan diha duol sa overpass sa Osemeña Boulevard.

Si Police Officer 1 Domino Decoriña, desk officer sa Abellana Police Station nibutyag nga adunay laing langyaw ang nabiktima sa pagpanguot.

Si David Anthony Jeed, 64-anyos, Australian national nakuotan sa iyang pitaka nga adunay sulod nga P8 mil nga kwarta.

Si Jeed nakuotan kini diha dapit sa Mango Avenue samtang nagtan-aw sa Sinulog grand parade.

Sa oras sa pagsuwat niining balita kagahapon sa hapon ang maong mga biktima pa ang natala nga nakuotan.

Nunot niini, ang kapolisan sa Abella Police Station walay natala nga mga bata nga nawala o nabuwag sa ilang mga kuyog.

Samtang sa Parian Police Station sa nahisgutang oras walay natala nga biktima sa pagpanguot atol sa Sinulog grand parade kagahapon. (BANAT NEWS)