Amihanang bahin sa Sugbo nangmingaw kagahapon
CEBU, Philippines — Nangadlawon paingon sa Dakbayan sa Sugbo ang mga residente sa amihanang bahin sa Lalawigan sa Sugbo aron makaapil sa pontifical mass ug makapanagkot sa Basilica Minore del Santo Nino ingon man sa pagsaksi sa Sinulog Grand Parade.
Wala usab makapugong ang pagpanghulga sa Tropical Cyclone Warning Signal (TCWS) Number 1 tungod sa Tropical Depression Amang sa Northern Cebu.
Si SPO2 Rene Camargo sa Danao Police Station miingon nga namingaw ang ilang dapit bisan Domingo nga walay trabaho.
Giangkon sab ni SPO2 Jayson Gayo sa Liloan Police Station nga wala sila makatala og mga panghitabo sukad pa niadtong Sabado.
Samtang si PO3 Jayson Flores sa Presinto 1 sa Mandaue City Police Office (MCPO) miingon nga nabahin ang pagtagad sa mga tawo sa Sinulog sa Dakbayan sa Sugbo ug ingon man sa away nila ni Manny Pacquiao ug Adrien Broner.
Nunot niini daghang drayber sa PUJ nga nagpahimulos sa ilang pagbiyahe sa daghang pasahero pagka buntag apan mihunong lamang sa makadiyot sa pagtan-aw sa telebisyon sa fight ni Pacquiao ug Broner diin subling napanalipdan sa Pambansang Kamao ang iyang bakus. (BANAT NEWS)
- Latest
