Mabulokon ug hapsay ang fluvial procession
CEBU, Philippines — Mabulokon, hapsay ug malinawon ang fluvial procession kagahapon sa buntag kay walay mga gikataho nga dautan panghitabo ug maayo usab kayo ang dagan sa panahon.
Si Police Chief Supt. Debold Sinas, direktor sa Police Regional Office (PRO-7) miingon nga napatuman gyud sa Philippine Coastguard ang ilang nasabutan ug ang pagpatuman sa istriktong mga lagda alang sa tanang sakayan nga miapil sa maong kalihukan.
“It’s static. Awesome. Nalipay ko kay ang Coastguard ni-implement as planned. First time ni nako sa pag-apil sa fluvial og nalingaw ko. Among gibuhat mao lang puro gwardiya,” asoy pa ni Sinas.
Nanghinaut siya nga magpadayon unta ang kahapsay ug kalinaw sa mosunod pa nga kalihukan sa Sinulog.
Nasayran nga gisugdan ang pagdala sa mga imahe ni Sto. Nino ug Birhen sa Guadalupe mga tres sa kaadlawon pagkahuman sa farewell mass sa National Shrine of St. Joseph sa Dakbayan sa Mandaue paingon Mandaue-Mactan Bridge ug lahos na sa National Shrine sa Birhen sa Regla sa Dakbayan sa Lapu-Lapu.
Laing misa ang gihimo una pa gipalahos ang mga imahe sa Muelle Osmeña Wharf diin nagpaabot ang galleon nga ilang luwanan alang sa fluvial procession.
Alas 6:15 nagsugod ang prosesyon sa kadagatan ug milanat kini og usa ka oras ug tunga sanglit alas 7:30 sa buntag kagahapon hingpit nga nakadunggo ang galleon sa Pier 1, sa Dakbayan sa Sugbo.
Ang tinuig nga fluvial procession giubanan karong tuiga og 82 ka nagkadaiyang sakayanan ingon man mga deboto nga nagsud-ong sa daplin sa Mactan Channel. Aduna say mga tawo nga nagpaddle board atol sa prosesyon ug nag-jetski. DILT, (BANATNEWS)
- Latest
