Kurapsiyon makapawala sa dignidad sa tawo

CEBU, Philippines — Mas daghan ang miuban nga mga deboto sa gipahigayon nga Walk with Mary kagahapon sa kadlawon kon ikumpara kini sa gihimong Walk with Jesus niadtong miaging semana.

Si Cebu City Police Office director Royina Garma naglanayon nga miabot sa 350 mil ka tawo ang miuban sa tinuig nga kalihukan. Gani mas hapsay usab kini karon human sila makat-on sa milabay nga kalihukan.

Nasayran nga adunay gihimo nga mga adjustment ang kapolisan sama sa pag-deploy og mas daghang sakop ug paghawan sa kadalanan. Direkta usab nga makahatag og instruction si Garma ngadto sa ground commander kay makita man niya sa CCTV nga gipakatap sa mga rota sa prosesyon ang maong kalihukan.

Si Fr. Alladin Luzon, OSA, director for safety, security, peace and order, mapasalamaton kay hapsay ang Walk with Mary ngadto na sa traslacion kay walay mga kalangay sama sa ilang nasinati sa milabay nga katuigan.

Atol sa Misa de Traslacion, gipahaum ni Padre Manuel Tan ang iyang wali sa panahon sa eleksyon diin iyang gipahinumduman ang mga Katoliko nga ang kurapsiyon maoy makababag sa pagpakita sa birtud ni Sto. Niño sama sa pagpaubos ug pagserbisyo. Kini iyang gibasi sa tema sa kapistahan karong tuiga nga “Sto Niño: Guide of God’s Children to Humility and Service. Si Fr. Tan mao ang kura paruko sa Our Lady of Guadalupe Parish

“Gikan diay na sa kahiladman sa tawo ang corruption nga maoy nakababag kanato pagsunod sa panig-ingnan sa Sr. Sto. Niño diha sa pagkamahipaubsanon ug pagkamatinud-anon sa pagpangalagad,” matud ni Tan.

Mihatag usab kini og gibug-aton nga adunay mahinungdanong papel ang mga ginikanan sa pagpakgang sa ilang mga anak nga makakat-on sa kurapsiyon nga buhat nga magsugod sa panimalay.

Matud niini nga kinahanglan nga ang mga ginikanan maoy unang mobadlong sa ilang mga anak nga dili mamintaha diha sa ilahang kaugalingong panimalay.

Gilakbitan usab sa pari ang libro sa Santo Papa nga giulohan og “The Way to Humility” diin ang kurapsiyon makapawala sa dignidad sa tawo sa pagpangalagad. Mao nga kinahanglan kining kurihian. Iyang gihimug-atan nga ang kurapsiyon dili ra diha ra sa pipila apan sa tanang sector sa katilingban bisan na gani sa simbahan ug sa politika.

Iyang tambag nga aron mapakgang ang “corrupted” nga kasingkasing, kinahanglan nga ibakanti kini gikan sa mga materyal nga mga tinguha.  (Joevelon G. Pinay/DILT)(BANATNEWS)