Mga contingent gi-final briefing, tarpaulin sa politiko gipatangtang

CEBU, Philippines — Gipaubos kagahapon sa final briefing ang mga contingent nga moapil sa Sinulog grand parade karong Domingo.

Ang tanang representante sa nagkalain-laing contingents ug ang mga apil sa float, higantes ug puppeteers ang nitambong sa maong final briefing nga gipahigayon diha sa gym sa Abellana National School.

Ang mga contingent nipadangat sa ilang mga pangutana labot sa umaabot nga kalihukan.

Si Konsehal Dave Tumulak, Sinulog executive committee chairman ang nitubag sa mga pangutana  aron mahatagan kini og katin-awan.

Gipasabot  ni Tumulak ang mga kausaban nga gipatuman sa Sinulog 2019 diin kabahin kini sa pagpangandam sa kalihukan sa tuig 2021 nga mao ang paghandom sa ika-500 nga pag-abot ni Ferdinand Magellan sa Cebu.

Matud ni Tumulak nga gawas nga pagpangandam sa 2021 kabahin usab kini sa lakang sa Sinulog Foundation Inc.(SFI) nga ang tinud-anay nga foundation sa Sinulog mao ang entertainers ug performers.

Si Tumulak nagkanayon nga ang matag contingent nasayod na usab nga dunay signal shut down nga buhaton atol sa solemn procession ug Sinulog grand parade.

Adunay gibutang nga communicators sa matag contingent aron ang komunikasyon dili maputol ug mahibaw-an ang ilang nahimutangan.

Kahinumduman nga sa niaging tuig gipatuman usab ang signal shut off hinuon walay problema nga nasugatan ug adunay contingency plan nga gihimo.

Subay na sa kalihukan sa Sinulog, si Tumulak nihangyo sa mga politiko nga magsuroy-suroy sa rota sa Sinulog nga dili mag-selfie aron ang mga dancer dili malangay.

Ug kong mahimo dili nalang mosakay og float aron malikayan ang mga dili maayong panghitabo.

Nunot niini, gitinuod ni Cebu City Mayor Tomas Osmeña ang iyang pamahayag nga dili tugotan ang mga politiko nga mopahimulos sa kasaulogan sa Sinulog.

Usa sa nasampolan ni Osmeña ang tarpaulin ni Ilocos Norte Governor Imee Marcos nga gibutang habig sa Imus road corner General Maxilom avenue niining siyudad diin iyaha kining gipatang-tang sa Prevention, Restoration, Order, Beautification and Enhancement (PROBE).

Kahinumduman si Mayor Osmeña una nang nipadayag nga ang Sinulog alang sa mga bata ug dili kini angayan sagulan og politika. (/BDB)(BANATNEWS)