Duha ka durugista, wanted nasikop
CEBU, Philippines – Nikabat ngadto sa P120 mil ang balor sa nasakmit nga drugas sa duha ka buy-bust operations nga gipahigayon sa kapolisan sa Dakbayan sa Sugbo diha sa duha ka lugar sulod sa 24 oras. Ang unang operasyon nahitabo diha sa Barangay Sambag 1, Dakbayan sa Sugbo kinsa si Renan Diaz, 24-anyos, taga Barangay Sawang Calero, sa maong siyudad ang nasikop.
Nangulo sa maong operasyon si Chief Inspector Eduard Sanchez, hepe sa Abellana Police Station.
Nasakmit sa mga polis gikan kang Diaz ang 23 gramos nga shabu nga mobalor ngadto sa P70 mil base sa Dangerous Drug Board value.
Matud ni Sanchez nga padayon nila karong gisubay kong may kalambigitan ba si Diaz sa napatay nga drug lord nga si Jeffrey “Jaguar” Diaz. Ang suspetsado nihimakak nga aduna kini kalambigitan kang Jaguar ug nangangkon kini nga wala siya makaila sa maong drug lord.
Ang laing operasyon gipahigayon diha sa Barangay Mambaling kinsa si Prescila Mangila, 49-anyos ang nasikop sa kapolisan sa Mambaling Police Station pinangulohan sa ilang hepe nga si Chief Inspector Randy Caballes. Giingong nasakmit gikan kang Mangila ang P50 mil nga balor sa drugas.
Sa laing bahin, nasikop pinasikad sa warrant of arrest diha sa Barangay Baliwag, Lungsod sa Balamban niadtong Miyerkules sa gabii ang usa sa most wanted sa kapolisan sa lungsod tungod sa kasong frustrated murder.
Ang suspetsado mao si Michael Andrew Velasco alyas “Wail”, 28-anyos, residente sa Barangay Cabasiangan, Balamban.
Giingong si Velasco kinsa ang uyoan konsehal sa barangay diha masikop sa barangay hall sa Baliwag diin kini nitago.
Giingong si Velasco dugay-dugay na usab kini nga nagtago-tago. (Nichole Alexis A. Abas/BDB) (BANAT NEWS)
- Latest